Daiñ kuna ki Pulit ïa ki nongñiah thuk thuk bym don laisen, kynthup ki khynnah skul

Shillong, Naiwieng, 28: Ki Pulit pynïaid kali ka nongbah Shillong bad ki Pulit Enforcement jong ka tnat Transports ha ka sngi Baar ki la bteng ban talasi naphang ïa ki thuk thuk ar shaka kiba ïaid ha kylleng ka sor Shillong.
Kane ka jingtalasi jong ki Pulit ïa ki thuk thuk ar shaka ka long hadien ba la mih ki jingjia kiba sngewsih ha kine ki khyndiat bnai namar ka jingñiah thuk thuk khlemakor shaba palat jong ki nongñiah kaba lam shaduh u pud ba ki nongïaid lynti kin shu duhei ïa la la jong ka jingim bad don ruh kiba mynsaw jur. Nalor kata, ki don ruh ki nongñiah thuk thuk ar shaka kiba dang hapoh 18 snem ka rta kiba ñiah lymmuh bad ñiah shongshit khlem da pyrkhat shuh ïa ka jingshngaiñ jong ki nongñiah kali saw shaka ne ki nongñiah thuk thuk ar shaka kiba ñiah da ka jingphikir.
Ha kane ka jingtalasi, ki Pulit ki la lap ba bun na ki nongñiah thuk thuk ar shaka ki dei ki bym don satia ïa ka Driving License bad don ruh ki bym don ïa ki kot ki sla kiba biang bad ki la daiñ kuna ïa ki.
Ïa kane ka jingtalasi, ki Pulit ki la pynlong ha Umshyrpi Point, ha Mawblei, ha Mawlai, ha Laban bad ha Rilbong.
Nalor kata, ki Pulit ki la bat ruh ïa ki khynnah skul kiba dang hapoh 18 snem ka rta kiba la ñiah thuk thuk khlem laisen ha kaba la daiñ kuna ruh ïa ki.
Don ruh ki nongñiah thuk thuk kiba la shah daiñ kuna namarba ki ñiah thuk thuk da kaba phong da ki slipar namarba ka aiñ ñiah kali kam shah satia katkum ka Motor Vehicle Act.