Shillong, Naiwieng, 28: U Women Helpline Number 181 u la ïoh pdiang palat 36,000 tylli ki jingpan jingïarap bad jingïada na ki jingshah thombor ka longryngieng ha ka jylla Meghalaya.
“Ngi la ïoh pdiang haduh 36,362 tylli ki phone call kat haduh mynta ha kaba 477 tylli ki case ladep ban rejistar, 158 tylli ki case ki dei kiba dang pynim bad 304 tylli kiba la pynkut,” ong u Myntri ka tnat Social Welfare Bah Paul Lyngdoh haba ïakren bad ki lad pathai khubor haba jubab ïa ka jingkylli halor jingbuh jingkheiñ ha ka Jylla Meghalaya kaba kot 58% ki jingshah thombor bad ki jingshah batbor ki kynthei.
“Kane ka jingai jingïarap ka la ïarap bha ha ka jylla ha kaba kiba bun ki mlien ban buhrieh ïa ki jingjia bad ngim da kwah than ban da tih bniah ïa kiei kiei kiba jia hapoh ki saw kynroh jong ka iing. Ka jingshisha ka paw ba ki 36,000 hajar tylli ki phone call ba ngi ïoh pdiang ka pynpaw shisha ba ki jingjia ki kynrei bha,” u la bynrap.
Shuh shuh u Myntri u la ïathuh ba ka Sorkar ka la rai ban pyntreikam ruh ïa u Women Helpline Nomber 181 bad u Child Helpline Number 1098 ban pyntikna ba kine ki nombar kin treikam baroh 24 kynta.
Halor ka kamram jong ki Dorbar Shnong, u Bah Paul u la ong, “ngi la pdiang ban pynrung ïa ki Dorbar Shnong ha ka tnat Social Welfare bad ha ka jingshisha, katto katne ki phone call ki dei kiba la pynim da ka jingïarap jong ki Dorbar Shnong.”
U Principal Secretary in-charge Social Welfare u Sampath Kumar u la ong ba ka Sorkar ka la pan jingïarap ruh na ki Self Help Groups ban ïarap ïa ki longiing bad ban ïalam ïa ki sha ki One-stop centre khnang ba kin ïoh ïa ka jingïarap kaba paka na ka Sorkar.
“Ym tang ka tnat marwei kan leh, hynrei ngi donkam ruh ïa ka jingkyrshan jong ki longiing longsem bad ka imlang ka sahlang khnang ban pyntreikam bha ïa kane ka atiar ha kane ka jylla Meghalaya,” u la ong.
