Nongstoiñ, Naiwieng, 28: Ka long ka jingjia kaba pynmih ñiangkhriat ïa ki longiing longsem bad ka bym lah satia ban mutdur ba u Panah u la batbor ïa la la jong ka khunruit naduh ba ka dang dap 13 snem ka rta kat haduh ba kan da dap 15 snem ka rta.
Une u runar haduh mynta u dang ïaid laitluid na ki kti jong ka aiñ ha kaba ki Pulit kim pat shym la ïohkem satia ïa u.
Katkum ka ejahar ba la mudui da ka Kmie sha ki Pulit ka la kynnoh ba u Panah u la sdang ban leh ïa kane ka kam pohjait naduh u snem 2020 mynba ka khun kynthei jong ka, ka dang dap 13 snem ka rta hynrei ka khun kam nud satia ban ïathuh ha la ka kmie.
Ha ka ejahar, ka kmie ka la ïathuh ba dei tad haduh u bnai Jylliew, 2022 ba ka khun jong ka, ka la kem pang bad ka jingpang ka la bat kumba katto katne por bad dei ha ka por ba ka khun ka la shitom jur ka la phla ha la ka jong ka kmie ïa kaba la jia baroh.
Ka la ong ruh ba ha ka jingbym tip ïa ka aiñ ka la shu set tang halade marwei bad kam shym la ïathuh hano hano ruh ïa kaei kaba la jia ïa ka khun jong ka. Nalorkata ka la ong ruh ba dei tad haduh u bnai Jymmang, 2023 ka la pyntip ïa kane ka jingjia sha ki bahaïng hasem jong u kurim jong ka ha kaba ki bahaïing hasem la ai jingmut ba kan leit mudui da ka ejahar sha ki Pulit jong ka Nongstoiñ Women Police Station.
