Khliehriat, Naiwieng, 28: Ka Dorbar Shnong Umkiang, ka la pynpaw ïa ka jingsngewbynniaw halor ka jingbym shimkhia jong ka Sorkar na ka bynta ban pynbha ïa ka surok National Highway-6 ha ka thaiñ Umkiang, East Jaiñtia Hills District, naduh Umkiang Pyrtakuna Kuliang, Dona bad ka thain khappud Narpuh baroh kawei.
“Ka jingbym shimkhia jong ka Sorkar ban bthah ïa ka NHAI/NHIDLC ban pynbha ïa ka surok National Highway-6 ka la pynlong ïa ki nongshong shnong ban ïoh pang haba ring mynsiem khamtam ki khynnah khyllung ha kine ki bnai tlang. Ki paitbah nongshong shnong kiba sah ha shilynter jong ka surok kim lah shuh ban pynkhreh ïa ka jinglehkmen Christmas namar ym long shuh ban ai rong ne pynbha pynitynnad ïa ki iing ki sem na ka daw ka jingjur palat u pum pum,” la ong u kyrwoh ba la phah da u Waheh Shnong ka shnong Umkiang u Bah Lasting Pala bad u Secretary Shnong u Bah Nicholas Lyngdoh.
“Ha ka jingshisha ka don ka komeni Laxmi na Silchar kaba wan trei teng teng malu mala bad kaba trei tang dep rukom bad ka khlem lah ban pynbha kumba dei ban leh. Haba ki nongïalam shnong ki kylli balei kim trei bha ïa ka surok, ka jubab ka long pynban ba kim ïoh pisa na ka Sorkar,” la ong u kyrwoh.
Kane ka jingbym kheiñ snep jong ka Sorkar Meghalaya/NHIDCL ban shna pynbha ïa ka surok ka la pynkordit ïa ki nongleit nongwan bad ïa ki nongshong shnong namar ki hap ban sait ïa ki pliang shwa ban bam jingbam na ka daw ka jingsop da u pumpum nalor ka jingbun ki Kali heh/ barit kiba ïaid 24 kynta, la bynrap u kyrwoh.
Ka Dorbar Shnong Umkiang ka la maham ruh lada ka Sorkar Meghalaya kam sngap ïa ka jingud jong ki paitbah nongshong shnong ka thain Umkiang ban pynbha ïa ka surok NH-6 ha kine ki sngi kin pynlong da ka jingïakhih da kaba mih paidbah sha surok.
