Shillong, Naiwieng 28 : U aktor ba pawnam ha ka Bollywood ba ak ha ka phlim 3-Idiot bad Munna Bhai MBBS u Boman Irani hynne ka sngi u la poi ha nongbah Shillong ban kynduh ïa ki katto katne ki nongïalam ba pawnam kynthup ruh ïa ka longkmie kaba shna ïa ka phlim Chithi, ka Kong Simi Khongtiang.
Ha ka jingkynduh bad kane ka longkmie kaba pynmih ïa ka phlim kaba yn sa pyni paidbah naduh ka 01tarik Nohprah, na ka liang utei u aktor Bollywood u la kular ruh ban peit bad bishar ïa katei ka phlim bad ruh wat ban kyntiew lang.
“Na ka liang une u aktor ba pawnam u la ai mynsiem bha ïangi bad u la pan ruh ban rah ïa ka phlim sha Mumbai ban peit. Ha kajuh ka por u la pynshlur ruh ba ngin ïaid shakhmat ha ka kam ak phlim ryngkat ka jingai mynsiem ba un ïarap wat ban plie ka lad ban pyntbit shuh shuh ha kane ka kam,” ong i Kong Simi hadien ka jingkynduh ïa u.
Shuh shuh i la ïathuh ruh ba u la ai ka jingïaroh ïa ka khun jong i, ka Ekratia Khongtiang kaba dei ka puron ba hakhmat ha katei ka phlim bad kumjuh ïa ka kynhun hi baroh kawei ha katei ka phlim.
Ha kajuh ka por, kane ka longkmie ka la pyntip ruh ba ïa mynta hi ïa katei ka phlim kin sdang ban pyni shwa ha ki shnong da kaba sdang na Jowai naduh ka 01tarik Nohprah khnang ba ki paidbah kin ym donkam ban da pynlut bai kali ne bai lynti ban wan peit khnang shaduh Shillong.
