Shillong, Naiwieng 28 : U Myntri Rangbah ka Jylla Conrad K Sangma ha ka sngi Ba-ar, ula pynbna ïa ka shnong Chigitchakgre kaba hap hapoh ka Gambegre C&RD Block, West Garo Hills, kum ka “Shnong ki Ngap” ne “Bee Village”.
Ula ong ba kane ka shnong ka la ïoh ïa baroh ki jingkyrshan ban thep ïa ka ngap ha ki bitor, pyninam ïa ki mar bad ban leh ïa shibun ki kam kiban kyntiew ïa ka shnong kum ka “Shnong ki Ngap” ka ban khring ïa ki nongshang sawari.
Ula ong ba hapoh ka Apiculture Mission 2.0, ka Sorkar Jylla ka la kyntiew ïa ki kam ban pynmih bad saiñ ïa ka ngap. Ula ong ba da ka jingpynbna kum ka shnong ki ngap, kan nang plie lad ïa ki paidbah bad ki nongshang sawari ba kin wan ïuhkjat hapoh ka Jylla, nalor ka jingplie lynti ïa kiwei pat ki kam ki ban kyntiew ïa ka roi ka par bad ka ïoh ka kot.
U Myntri Rangbah ula pynbna ruh ban ai song jingïarap ba T.10 lak naka CMSDF sha ka Shnong ba kan nang pynkhlaiñ ïa ka jingpynmih ngap hapoh ka Shnong.
Ha kajuh ka por, u Myntri Rangbah ula kyntu ïa ki paidbah ba kin shim kabu ïa ka CM-Elevate, ka skhim jong ka Sorkar Jylla kaba kyrshan ïa ka jingsengkam lajong.
U MDC ka Gambegre Rakesh A Sangma bad Deputy Commissioner Jagdish Chelani ruh ki la ïadonlang ha kane ka prokram.U Myntri Rangbah ula ïathir bad ïasyllok ïa shibun kiei kiei bad ki nongshong shnong ha kane ka prokram.
