Tyrwa jaka ei sha ka Sorkar ban shna ïa ka Rehabilitation Centre
Thrang ki Dorbar Shnong ban rat dyngkhong ïa u drok
Shillong, Naiwieng 28: Bun bah ki Dorbar Shnong kiba thrang da shisha ban rat dyngkong ïa u drok na ki shnong ki thaw jongki bad halor kane ki la ai ka jingtyrwa jaka ei sha ka tnat Social Welfare khnang ba kan tei ïa ki Rehabilitation Centre ha ki shnong jong ki.
ïa kane la pyntip da u Myntri ka tnat Social Welfare u Bah Paul Lyngdoh uba ïathuh ba kane ka jingtyrwa sha ka Sorkar ka dei na ka bynta ban pyntreikam ïa ka Drug Reduction Elimination and Action Mission (DREAM) projek jong ka tnat.
“Ki la don ki Dorbar Shnong kiba la tyrwa ban ai jaka ei sha ka tnat ban tei ïa ki Rehab Centre na ka bynta kito kiba kyrni Drok hapoh ka projek DREAM ban ïakhun pyrshah ïa ka jingma ka ba mih na u Drok” ong u Bah Paul.
U Bah Paul ula ong ba kane ka jingwan shakhmat ki katto katne ki Dorbar Shnong ka dei ba ki kwah ban ïatreilang bad ka Sorkar ban rat dkhong ïa u drok na la ki shnong.
Ula ong ba kane ka long kaei kaei kaba sngewtynnad bad ka paw ba ka imlang sahlang, ka don ka jingkit khlieh ban ïakhun pyrshah ïa u Drok.