Shillong, Nohprah 13: Ki thei ïalehkai phutbol jong ka Laitkor SC ki la bteng ïa ka lynti ïaid ha ka lympung Shillong Sports Association Women’s Football League 2024 da kaba jop kput haduh 19 kol ïa ka Mawpat SC ha ka jingïakhun kaba ar jong ki na ka Group-A ha ka sngi Thohdieng (13.12.2024) ha MFA Turf, Polo.
Ka Daiamon Makroh jong ka Laitkor SC ka la long ka thei ïalehkai kaba la seisoh tam ha kane ka jingïalehkai da kaba khyrwit ar tylli ki hat trik ban ai mynsiem ïa ka kynhun ban khur shalade ïa ki lai point. Baroh hynriew tylli ki kol ka Daiamon ka la ïoh ban thep ha ka kylla step jong ka jingïalehkai (2, 9, 10, 18, 19 & 27min) ban pynthikna lypa ïa ka jingjop na bynta ka kynhun.
Nalor ka Daiamon, ka Ibashisha Khongwet (7, 11 & 62 minit) bad ka Ribahunshisha (38, 46 & 51 minit) ki la ïoh ïa ka hat trik na bynta ka kynhun ha kane ka jingïalehkai.
Ka Tracy Rympei (31 bad 33minit), ka Philasakhi Marngar (5min bad 55minit) ki la ïoh ban thep mar ar kol, katba ka Ibakordor Wahlang (50min), ka S E Peinlang- (56 min) bad ka S Nongrum- (59min) ki la ïoh ban pynkhihjar mar shi sien.
Da kane ka namjop ka Laitkor ka la ïoh ban kamai mynta 6 poiñ na ki ar sien ïakhun.
Ka jingïalehkai ha kane ka sngi kan long hapdeng ka Kharang SC pyrshah ïa ka PFR FA na ka Group-A, ha ka por 4 shiteng janmiet ha MFA Ground, Polo.
