Bteng biang ka jingpynpra sa ïa ki ar tylli ki Karkhana coke beaiñ kiba don ha EJHD

Khliehriat, Naitung 18: Ki bor district jong ka East Jaiñtia Hills District, hapoh ka jingpeit jong u Additional Deputy Commissioner, East Jaiñtia Hills, u bah J.Shylla, MCS, mynta ka sngi la bteng biang ïa ka jingpynpra sa ar tylli ki karkhana coke, M/s Kamakhya Coke, kaba don ha Synrang Khimmyrsiang (hajan Lelad) kaba hap hapoh ka Elaka Sutnga bad kawei pat ka M/s SSS Coke ha Thanguatah ba hap hapoh Elaka Sutnga, kiba la shu tei beaiñ khlem pat ioh ïa ka Consent to Establish (CTE) na ka tnat Meghalaya State Pollution Control Board, ïa kitei ki karkhana la pynpra da kaba shu pynbthei da ki bom ha ka por 2.30 myn sngi bad 3.30 janmiet.
Ha ka por ba pynbthei ïa ki bom ha katei ka karkhana la ïa don lang ruh ka kynhun na ka ophis jong u Superintendent of Police, East Jaiñtia Hills District, ki nongtrei na ka tnat Meghalaya State Pollution Control Board bad na ka tnat District Commerce and Industries Centre..
Ka jingpynpra ïa katei ka karkhana ka long ruh katkum ka hukum lane ka Order No:EJHD/GENL.261/COKE/Pt.IV/2023/151 Dated 7th July, 2023 bad ka Order No: EJHD/GENL.261/COKE/Pt.IV/2023/152 Dated 11th July, 2023, ba la dep pyllait da u
Deputy Commissioner ka East Jaiñtia Hills District.
Kum ban shu phai dien, naduh ka 12 tarik mynta u bnai naitung, ki bor district jong ka East Jaiñtia Hills District, ki la sdang ban pynpra ïa ki karkhana coke kiba la shu tei beaiñ hapoh ka district ha kaba ha ka 12 tarik la pynpra ïa ka M/s Halari Coke kaba don ha Pohrasong bad ka M/s Shauryamsi coke kiba don hapoh elaka sutnga bad ha ka 13 tarik la pynpra ïa ka M/s Druk Fuel Limited kaba don ha Nongjri kaba hap hapoh ka elaka Sutnga.
La ong ruh ba ka bor district kan nang ïai bteng shuh shuh ïa ka jingpynpra ïa kiwei kiwei ki karkhana coke ruh kiba dang don hapoh ka district kiba la tei beaiñ khlem pat ïoh ïa ki CTE na ka tnat Meghalaya State Pollution Control Board.