Mawkyrwat, ‘Naitung 18: Ki runar bym lah ithuh da kaba thmu ban leit tuh ki la leit ban prong ïa kawei ka ophis treikam kaba don ha Mawkyrwat, ka Khasi Hills Autonomous District Council (KHADC) Mawkyrwat Branch, kaba don ha Pyndenspar-Laitlawsang, Jakrem, South West Khasi Hills District.
Katkum ka jingïathuh jong u bah S. Tiewsoh, Superintendent jong ka Taxe, In-charge KHADC Mawkyrwat Branch u la ong ba halor kane ka jingjia ïa ka sngi bad ka por jong ka jingjia ym la shuh ban tip, la ka dei ha ka sngi saitjaiñ ne ka Sngi U Blei ne ha ka Lah sngi U Blei, namar naduh ka sngi saitjaiñ haduh ka lah Sngi U Blei kane ka ophis ka khang ba ym dei ki sngi longtrei. “La shu antad noh ba kiba leh ïa kane ka kam ki leh ne ki wan prong tuh ha ki por miet”, ong u bah Tiewsoh.
Halor kane ka jingjia, la ïathuh shuh shuh ba katkum ki dak ki shin ba paw ki dien kjat ha ki bynta ba habar jong ka mala ba shajrong, ki runar ki la kiew na shadien jong ka jingtei da kaba ki la pynpait ïa u huk jong ka jingkhang bad rung shapoh ki kamra. “Ki runar ki la pynjot ruh ïa ki tala bad pynphriang ïa ki kot ha ka kamra ba shong u Superintendent of Professional Taxes, In-charge Mawkyrwat Branch Office, ka kamra ban leh ïa ki Professional Taxes bad ym tang kata wat ïa kamra ba shong ka Magistrate First Class, Subordinate District Council Court Khasi Hills, Mawkyrwat ruh ki la pynphriang ïa ki kot ki sla sha madan”, la ïathuh.
Katba ha ka tyllong khubor na ki pulit pat, la ïathuh ba halor kane ka jingjia na ka liang u bah S. Tiewsoh, Superintendent jong ka Taxe, In-charge KHADC Mawkyrwat Branch u la dep ban buh ka ehjahar kum ka jingpyntip bad na ka liang ki pulit ruh ki la leh ïa la ka jong ka kamram bad la ong ba haduh mynta ïa ka jingjah jong ki kot ki sla ne ki tiar ki tar ym lah ban tip bad ka jingtohkit ka dang ïaid shakhmat.
