‘Ka ‘Load Shedding’ ka pynjynjar ym tang ïa ki nong Sor hynrei ïa ki Nongkyndong ruh’

Nongstoiñ, Naitung 18: Ka jingpynlip lait lane ‘Load Shedding’ ka ktah ka pynjynjar ym tang ïa ki nong Sor, ïa baroh hi salonsar kynthup ïa kiba na ki jaka nongkyndong ruh, pynpaw ki nongïalam jong ki ar seng, kata ka West Khasi Students Union bad Western Youth Federation.
U samla Donlad Marweiñ nongïalam ka seng WYF haba ïa kren bad u nongthoh khubor, u la ong, “Ngi pynpaw ka jingsngewkhia bad ym sngew lah pdiang haba ngi ïoh sngew ïa ka jingpynbna jong u Chairman jong ka Managing Committee jong ka MeECL, ha kaba u la pynbna ba yn pynjynsur noh ïa ka rukom pynlip lait ha ka Jylla. Hynrei, lyngngoh pat ba kata ka rukom pynjynsur ka long pynban kaba noh shilliang”.
“Balei ha Shillong Jowai bad Tura yn pynlip bording satang 2 kynta, katba ha ki jaka nongkyndong lane ha kiwei ki District, ka jingpynlip lait ka long beit 5 kynta”, u la ong bad bynrap, “Kum ïa kane ka jingleh ngim sngew ïahap bad ngim sngew lah ban pdiang, namar haba ka Damsite ka la dap um hynrei dang pynneh sah ïa ka jingpynlip lait”.
“Lada dang hap pynlip lait ruh dei ban long ryntih ïa baroh, namar mynta lah ar bnai lai bnai ki paidbah ki la shem jynjar, khamtam ha ka dong ka thaiñ jong ngi, bun bah ki khun samla kiba trei ïa ki kam ba bun jait lyngba ka bording, ki la shah ktah jur. Khamtam eh kito kiba shim da ka ram ka shah ha kaba ki shem jingeh ban siew ïa ka ram ba ki shim tang na ka jingpynlip lait ba la palat pud”.
“Ka long ruh kaba lyngngoh ba kumba long baroh shikatta, haba ka jingpynlip lait ka long da ki san lane hynriew kynta ha ka shi sngi, katba ka bill lait pat ka neh kumjuh khlem don kano kano ka jingpher. Ngi sngew dei ban dawa ba lada leh dei ban long kaba ryntih ïa baroh ki District. Lada ka dei ban pynlip lait 2 kynta ka dei ban long kumjuh sha baroh, ym ban noh shilliang lada dei ïa ki nongsor ne nongkyndong”, u la ong.
Kumjuh ruh na ka liang u samla D.Sun nongïalam ka seng WKSU u la ban ïa ka juh ka phang halor kane ka jingleh jong ka tnad MeECL bad ka sorkar. U la ong ba kane ka jingleh kaba noh tarajur, ka pynpaw pynban ba kam don ka jinglong ryntih ha ki liang baroh hapoh ka Jylla. Namar kata ki bor ba dei peit ïa kane ka bynta, ki dei ban da pyrkhat sani ym ban shu noh shillïang lada dei ha sor ne nongkyndong.