Bret patar ki paidbah ha ki rud surok NH bad khamtam ha ki shnong ba duna ïingbriew

Nongpoh, Jylliew 27: Bun naki paidbah kiba ïaid lynti ha surok bah National Highway ki ju pynlong ka jaka bret ñiut haki rud surok bah khamtam haki shnong ba duna iing briew ban kawang beit sharud surok bad wat ki jaboh ba kila song nala iing ki thep ha kali ban leit bret sha surok kumba la sakhi ruh da katto katne ki paidbah haka por ba ki mareh step.
La sakhi ruh ha ki katto katne ki jaka ha shilynter u surok National Highway ha Ri-Bhoi District khamtam haka thaiñ Umling, Umran, Umsning By-Pass bad kiwei kiwei ki jaka nalor ki jaboh jabaiñ wat ki masi iap ruh la kawang sharud surok kaba la ju wanrah ka jingsma iwtung kaba shyrkhei haba ïaid lynti naka jingbeh ka lyer.
Ka khuid ka suba kadei ka thong jong kawei pa kawei ka shnong, hynrei ka jingkhlem akor jong ki paidbah ka long kaba eh ban tehlakam, namar teng teng la ju kawang ruh ïaki song kiba heh najrong kali sharud surok kat haba lap bas hem.
Kane ka jingleh khlemakor kala wanrah ka jingijli bad sma iwtung ha kiba bun ki bynta nalor ka jingbym itynnad ban peit hapdeng ka mariang kaba jyrngam bad donkam ba ka sorkar bad ki shnong kin buh da ki kyndon kiba tyngeh ban tehlakam bad ban ai jingsneng ïaki briew kiba mlien ban leh kum kitei ki jait kam.
Kum ban shu pynkynmaw naka liang u Deputy Commissioner ka Ri-Bhoi District bad Chairman ka DDMA u la pynmih da ka hukum dang shen ban khang pyrshah bad mana ïaki paidbah ban bret pathar ïaki jaboh jabaiñ, haki wah duid, ki wah heh, ki nala bad kumjuh ruh ha shilynter u surok bah National Highway 6 ha Ri-Bhoi District, hadien bala iohi ba bun naki ki paidbah, kila bret pathar ïaki jaboh jabaiñ, ki plastic bad kumjuh ruh ki mrad bala iap ha shi lynter u surok bah National Highway kaba ktah shikatdei ïaka mei mariang bad wanrah ruh ïaka jingshlei um bad ka jingset jong ki nala tuid um.
Bad naka liang ka bor district, kala maham tyngeh pyrshah ïa kitei ki briew kiba mlien ban leh ïa katei ka kam ba kim dei ban bret pathar bad dusmon ïaka mei mariang bad la kyrpad ruh ïaki paidbah bad ki nongshong dukan khamtam ba ki dei ban bret haki jaka ba dei bad lada lap ïa kino kino kiba pynkheiñ kin ngat haka jingshah pynshitom tyngeh katkum ka Disaster Management Act 2005 ryngkat ka kuna.
Kumta ki paidbah ki dei ban sngewthuh ban shai ka jingmut jingpyrkhat ba wat ka jaboh kaba rit kim dei ban shu kawang na kali ban bret kat haba lap ba shem sha surok hynrei ban pynlang shi jaka bad ruh ban bret haka jaka ba dei ban bret bad naduh ki kali kamai ki dei ban hikai ïaki nongshong kali ba kim dei ban kawang na jingkhangiit ïaki jaboh lada ngi kwah ba ka mariang bad ki sawdong sawkun kan khuid bad itynnad.