Dei ka jingpynbeit ryntih ka sorkar ïa ka pule ka puthi ym ban pyntroiñ : Lahkmen Rymbui

Shillong, Jylliew 27 : U Myntri ka tnad Pule Puthi Bah Lahkmen Rymbui ha ka sngi Thohdieng ula kyntait ïa ka jingkynnoh ba ka Sorkar ka la pyntroiñ ïa ka kam pule puthi haba ban jur ba ki jingpynkylla ba dang ïaid mynta ki dei da ka jingthmu ban pynbeit ryntih ïa ka rukom treikam baroh bad ban pynbha ïa ki skul bad college.
Ula kynthoh ïa kane halor ki jingkam jong ka kynhun ba ïalam da u MLA ka VPP bah Brightstarwell Marbaniang halor ka jinglong jingman ka jingai jingshakri bad ka jingsiew ïa ki deficit grant-in-aid college.
U Bah Rymbui ula ong ba ka kynhun ka la pynsngew ïa ka jingsheptieng ba ka Sorkar ka “pyrshang ban pyntroiñ ïa ka kam pule dangle da kaba pynduh noh ïa ki kyndon ka UGC”.
“Nga la batai ha ki ba ka Sorkar, ha ka jingshisha, ka pyrshang ban pynbeit ryntih ïa ka pule dangle baroh kawei, la ka dei ka pule puthi ha ki skul lane ki college” ong u Bah Rymbui. “Ngi la ïaid ha ka lynti ha kaba ka jingthmu ka long ban tei ïa ka rukom pynïaid kaba biang eh ha ka pule puthi na ka bynta ka Jylla”.
U ïathuh ba ka Sorkar kan sa shong bishar bha ïa kane ka kam. “Katto katne ngut ki nonghikai ki la ïa kynduh ia nga bad nga la ong ha ki ba ngin sa bishar bha ïa ka kam bad ban leh ïa kaei kaba bha eh na ka bynta ka Jylla bad ïa ka kam pule dangle” ula ong.
Halor ki jingujor ba katto katne ki college ki khlem pynmih jingpynbna ïa ki kam nonghikai, u Myntri ula ong ba ka jingpynïaid ïa ki college kam dei ka jingkitkhlieh jong ka Sorkar. “Ki college kim dei kiba pynïaid tang da ka Sorkar, ki dei ruh kiba pynïaid da ki society lane ki governing body. Ki dei ban khmih ïa la ki jong ki rukom pynïaid kam” ula ong.
“Ngin tuklar satang lada don ka jingbym biang ha ka jingai ïa ki jinghikai.Lym kumta, ka Jylla hi kam ju tuklar” ula ong.
U Bah Rymbui ula pynshai ba ïa ki kyndon ka UGC la pyntreikam mynta na ka bynta ka jingthungkam thymmai. “Baroh ki nonghikai ha ki college kim hap ban pynbiang ïa ki kyndon ka UGC” ula ong. “ïa ki kyrtong riewlum ba ïakhun ïa ka interview, ka kyrdan post graduate degree da 50% marks ka la biang eh ban thungkam bad ki lah ban ïoh ïa kiwei ki jingmyntoi ba ai ka UGC kiba la pyntreikam da ka Jylla”.