Ka jingïakhun ïa u drok kam dei ban kut ha ka jingïakren hynrei ka dei ban long da ka kam: CM

Shillong, Jylliew 27 : U Myntri Rangbah ka Jylla Conrad K Sangma ha ka sngi Thohdieng ula ong ba ka thma pyrshah ïa ka jingdih droks ka donkam ïa ki kam kiba thikna, ym tang ka jingïakren, haba ai jingkren ha ka jingrakhe ïa ka International Day Against Drug Abuse and Illicit Trafficking ha Shillong.
Ula kyntu ban bujli ïa ka jingibeiñ ikhoh ïa ki nongdih droks da ka jingsngew synei bad sngewlem haba kyntu ïa ki riew paidbah ba kin ïadon bynta lang ha ka jingïaleh pyrshah ïa u droks.
“Kane ka sngi ka pynïatylli ïa ka Sorkar, ki Shnong ki Thaw, ki Nonghikai, ki Balang ha kajuh ka mishon ban ratdyngkhong ïa ka jingdih droks, pynkut ïa ka jingkhaïi ïa u droks bad bujli ïa ka jingibeiñ ikhoh ïa ki nongdih da ka jingisynei bad sngewlem” ong u Myntri Rangbah haba ai khublei ïa ki kynhun bapher bapher kiba don bynta ha ka jingïakhun.
U Conrad ula ong ba ka DREAM, kaba sdang kum ka Mission, mynta kala kylla long ka jingïakhih jong u paidbah. “Ki jingpyrshang ban ïakhun pyrshah ïa u droks ki la don ha man ki kyrdan hynrei kam shym la don satia ka jingïatreilang bad ka DREAM Mission ka la wanrah lang hajuh ïa baroh kine ki kynhun, ki riew shimet bad ki seng” ula ong.
“Katba ngi wanrah ïa baroh hajuh, ka long ruh kaba kongsan ym tang ban shu ïakren hynrei ban leh da ka kam bad ban wanrah ïa ki sienjam kiba thikna bad suki pa suki, ka Sorkar kan kyrshan ïa ki riew shimet bapher bapher bad ki seng kiba ïatrei na ka bynta kajuh ka mishon bad ka thong”.
Ula ban jur ba kane ka jingrakhe kam dei tang ka jingleh ba shisien shisnem. “Ngi don hangne ban sngap ïa phi bad ïa ki jingai jingmut jong phi” ula ong.
“Ka long kaba kongsan ban pynïadon bynta ym tang ïa ki kynhun bapher bapher hynrei ïa ki riew paid bah ruh ha kane ka jingïaleh pyrshah ïa u droks. Katba kane kam pat urlong kan ym don ïa kata ka jingktah kaba ngi kwah, kumta ngi hap ban pynjan sha ki riew paidbah”.
Ha kane ka jingrakhe, bala wan ïashimbynta ruh da u Myntri kam Jngohkai u Timothy D Shira, ka la sdang da ka jingïashim kular bala ïalam u Myntri Rangbah pyrshah ïa ka jingdih droks.
U Conrad ula plie ruh ïa ka Centre of Evolution ha Reid Provincial Chest Hospital ka ban ïarap ïa ki riew shimet ba dih droks lyngba ka jingkyrshan ha ka jingai jingsumar, jingïasyllok bad kiwei kiwei.
Ula sam ruh ia ki cheque sha ka Achik Welfare Society, Tura, The Bridge Society, Nongstoin, Khasi Presbyterian Assembly (Selda), Jowai, Dream Solace- Centre For Hope & Recovery, Shillong namar ki kam ba ki leh ha kaban pynsngewthuh paidbah pyrshah ïa u droks, ka jingkyrshan bad jingsumar ïa ki nongdih droks bad ban ai jingïarap ïa ki ba kin wanphai pat sha ka imlang sahlang.