Sngewnguh ka JSM ïa ka JHADC ban thaiñ ïa ka ‘Jaintia Hills Autonomous District (Registration & Protection of Clans) Act, 2026’

Jowai, Jylliew 26: Ka Jaiñtia Students Movement (JSM), Central Executive Committee ka ai khublei kyrpang ïa ka Executive Committee jong ka JHADC ha ka jingïalam u CEM Bah Thombor Shiwat, namar ba ka la pdiang ïa ka jingdawa ba la rah lyngba ka Memorandum + URGENT DEMAND http://No.JSM/CEC/MEMO/JHADC-CB/2026/ dated 17/06/2026 ban thaw ïa ka ‘Jaintia Hills Autonomous District (Registration & Protection of Clans) Act, 2026’ katkum ka Para 3(1)(b) jong ka Sixth Schedule.
Kane ka rai, kaba la pyntip lyngba ka shithi http://No.JHADC/POL/61/2025/17 dated 26/06/2026, ka wan hadien ba ka JSM ka la ai jingkyrshan pura ïa ka rai ba la shim da ka Dorbar Waheh Kur Ri Jaiñtia ha ka Annual General Meeting ha ka 13/06/2026 ha Chilliangraij.
Katkum ka Article 244(2) ryngkat bad ka Para 3(1)(b) jong ka Sixth Schedule, ka JHADC ka don ka bor ban thaw aiñ halor ka “inheritance” bad “social customs”. Ki kam registration Kur, ka jinghiar pateng, ka bor ka Dorbar Kur bad ka jingïada ïa ka jaka pateng ki hap beit hapoh kane ka bor.
U samla Heihokmi Supuh, Publicity Secretary u la ong ba ka JSM ka kyntu ïa ka JHADC ba kan thaw noh ïa ka “Jaintia Hills Autonomous District (Registration & Protection of Clans) Act, 2026” shuwa ban wanrah ïa ka Draft Bill ha ka Dorbar ban wan bad ba kan pynlong ïa ka jingïalang ïamir jingmut bad ki Waheh Kur bad ki Dorbar Tynrai haba thaw ïa ka Bill.
U la ïaroh ïa U CEM ma Thombor Shiwat bad ka EC kaba la pynpaw ïa ka jingskhem mynsiem ban ïada ïa ka riti. Kane ka Aiñ kan ïada ïa ka ‘Kur Tre Ri’ – ki Kur Tynrai na ka Bei, kan pynkhlaiñ ïa ka Dorbar Kur, kan buh ïa ka Bor u Rangbah Kur bad kan ïada ïaka Kur Ankhur na ka bynta ki pateng ban wan.