Halor ka CPR bad First Aid ai jinghikai ka Tnad pulit, ophis DMHO ïa ki pulit pynïaid kali bad home-guard

Shillong, Jylliew 27 : Ka ophis jong ka District Medical & Health Officer (DMHO), East Khasi Hills, ryngkat ka jingïatreilang bad ka Office u Additional Superintendent of Police (Traffic), East Khasi Hills bad Police Hospital, Police Reserve, Shillong ka la pynlong ïa ka prokram ai jinghikai kaba neh shi taïew halor ka CPR (Cardiopulmonary Resuscitation), Basic First Aid bad ka jingtest Non-Communicable Diseases (NCDs), ha Conference Hall jong ka Police Reserve, Shillong.
Ka jingthmu jong kane ka prokram ka long ban pynkhlaiñ ïa ka jingnang jingtip bad kumno ba ki pulit pynïaid kali (traffic police) bad ruh ki volunteer Home Guard ba kin lah ban ai jingïarap mar mar ha ki por ba don kano kano ka jingjia ba kyrkieh, kum ha ki aksiden surok, jingpang klongsnam, kiwei pat ki jingmynsaw kiba buh jingma ïa ka jingim, shuwa ba ki nongsumar ne ki doktor kin poi sha ka jaka.
Kum shi bynta jong kane ka prokram, la pynlong ruh ïa ka jingtest Non-Communicable Diseases (NCDs) ban lap kloi ïa kiba don ka jingshitom kum ka High Blood Pressure (Hypertension), Diabetes bad kiwei pat ki jingpang kiba kham ju jia, khnang ban lah ban ai jingsumar ha ka por kaba biang.
Kane ka sienjam ka pynpaw ïa ka jingaiti jong ka Health Department bad ka Police Department ban pynkhreh bha ïa ki nongtrei kiba don ha khmat eh ha ka kam shakri paidbah ban ïakhun ïa ki jingjia ba kyrkieh, ryngkat bad ban sumar ïa ka koit ka khiah jong ki.
Ha ka jingbteng ïa kine ki prokram , la pynlong ruh ïa ka workshop kaba shi sngi halor ka Basic First Aid bad CPR ha ka 26 tarik Jylliew 2026 na ka bynta ki nonghikai bad ki samla pule jong St. Edmund’s Higher Secondary School, Shillong.
Ha kane ka workshop, la ai jinghikai halor ka rukom ithuh ïa ki dak jong ka cardiac arrest, ka rukom leh Hands-only CPR, ka jingïarap ïa kiba ym lah ring mynsiem (choking), ka rukom pynsangeh ïa ka jingphlei snam bad kiwei pat ki lad jingïarap ba kongsan (first aid).
Ka jingthmu jong kane ka prokram ka long ban pynkupbor ïa ki nonghikai bad ki samla pule da ki jingtip bad ki sap kiba donkam, khnang ba kin lah ban leh eiei da ka jingsngewskhem bad jingïaineh mynsiem ban pyllait im ïa ki briew ha ki por ba jia kino kino ki jingjia ba kyrkieh, haduh ba ki nongsumar ne ki doktor kin poi sha ka jaka.