Ha ka Operation Safer Shillong bat ki pulit haduh 80 ngut kiba ñiah kali ba la buaid
Tang shimiet 81,500 tyngka shah daiñ kuna
Shillong, Jylliew 27: Da ka jingthmu ban wanrah ïa ka jingshngain ha ka leit ka wan khamtam eh ha ka por mynmiet, ki pulit ka East Khasi Hills kila sdang ïa ka Operation Safer Shillong ban kynjoh sha ka Zero Road Fatalities, ha kaba ki pulit kila ioh bat haduh 80 ngut ki dribar ba ñiah kali kiba la dih kyiad.
Katkum ka kyrwoh khubor na u Superitendent of Police u Bah Vivek Syiem u la pyntip, Ïa kane ka Operation Safer Shillong ban kynjoh sha ka Zero Road Fatalities la leh da ki pulit jong ka Shillong Traffic bad ka Special Operation Team (SOT) kila pynlong ïa ka Naka ban talasi ïa ki kali ha ka miet 26 tarik u Jylliew.
Kane ka jingtalasi ne ka Naka checking la leh da ka jingkyrshan bad jingïashim bynta lang jong ki dkhot jong ka Dorbar Laitumkhrah, kila pynlong ïa ka jingtalasi ha kiba bun ki jaka jong ka sor Shillong.
Ki jaka ba ki pulit ki la pynlong ïa kane ka jingtalasi kadei ha ka thain Laitumkhrah, Khyndai Lad, Polo bad kiwei kiwei de ki jaka jong ka nongbah Shillong.
Ka jingthmu ba kongsan jong kane ka jingtalasi ka kham pynleit jingmut bha ha kaba ïadei bad ka jingdih buaid ha ka por niah kali, ka jingpynkylla ne modify ïa ki kali bad kiwei de kiba pynkhein ïa ki aiñ pynïaid kali.
Ki nongñiah kali kiba la lap ba ki la dih kyiad ha ka por ba ki dang ñiah kali na ka liang jong ki pulit kim shah shuh ba kin bteng ban ñiah kali bad ki sa pyllait noh hadien ba la wan ki briew ban bah khlieh ban ïalam ïa u sha ïing da kaba suk ba sain.
Ki jingpynjari aiñ ha ki sngi kut taiew kin ïai bteng man ka por hapoh ka Operation Safer Shillong.
Ka jingthmu ba ha khmat eh jong ki pulit ban leh ïa kane ka long ban kyntiew ïa ka jingpyniaid kali kaba don da ka jingkitkhlieh bad ym dei ban ñiah kali buaid da kaba bud ryntih ïa ki kyndon pynïaid kali khnang ba ka jingim kan long kaba shngain ha ka leit ka wan.
Ha kane ka Operation Safer Shillong kila ioh bat haduh 80 ngut ki briew ba dih kyiad por ba ñiah kali bad ka kuna ba ioh na ka jingshah daiñ kuna ba la ioh lum ka long T. 81,500.