Nongpoh, Jymmang 21: Kiba bun ki paidbah nongshong shnong ha Ri Bhoi la ki dei ha Nongkyndong ne ha ki jak aba la long sor ki la pynpaw shisha ka jingbitar halor ka jingthud palat ka bording ilektrik bad kane ka la ju ktah na ka por sha ka por ba ka tnad MeECL kam lah satïa ban pynbïang ïa ka bording ba thikna (Power stable) katkum ka jingdonkam ki paidbah.
Ïa kane la sakhi ba tang ha kine ki bnai ba la sdang slap bad khie eriong la bun ka por ba ka bording ka la shu lip bad ïa kaba ki paidbah ki ioh ban pyndonkam bad ïa kane la sakhi hi da ki paidbah kiba la pynpaw ka jingbitar kaba jur da kaba buh jingkylli kaei ka daw ka jingthud palat ka bording bad katba ïa ka bai bording pat ki hap ban siew thik thik man la u bnai.
La sakhi ruh ïa kane ka jingbym biang ka bording khlem da ïa kren sha ki shnong nongkyndong, hynrei wat ka Nongpoh kaba dei ka HeadQuarter ka District Ri Bhoi, ka mad ïa kajuh ka jingeh halor ka jingbym biang ka bording ilektrik ban sam sha ki paidbah.
Ka jingthud palat ka bording ka la ktah shisha ïa ki kam ki jam jong ki paidbah la ki dei kiba pyndonkam ha ki kam online ne kiba pyndonkam ha kor computer bad kiwei kiwei ki kam, ha kaba ha kane ka juk stad ba mynta khlem ka bording ilektrik baroh ki kam ki la shu sahkut bad bijai ei.
Kiba bun ruh ki riew paidbah ki la pynpaw ruh ka jingsngewkhia ba kumno ïa ka bording ilektrik la pynmih na Ri Bhoi bad katba ki paidbah ka dong Ri Bhoi pat kim ioh satia ïa kata ka bording ba thikna bad kane ka la long shisha ka jingshah ktah kaba jur ba bun ki kam ki jam ki la sahkut bad shah ktah ha baroh ki liang.
Uwei na u samla ka dong Ri Bhoi uba ym kwah ban pynpaw kyrteng, u la sakhi ba kane ka jinglip bording ka la ktah shisha ïa ki paidbah bad u la pynpaw ruh ba da lade hi u la mad ïa kane ka jingshah ktah ha ka jingbym biang ki bording bad bun ki kam kiba u hap ban pyndep ki la shu sahkut tang na ka daw ka jingbym biang ka bording ilektrik, namar ha ka shi sngi la bun kaba lip ka bording bad ïa kaba ki ioh pdiang ïa ka bording.
