Khliehriat iaiong 21: Mynta ki kali ha Ratacherra bad Malidor ki la lait ban iaid bad don tang ha ki katto katne hateng hateng ki jaka ba ki kali ki dang iaid tang shiliang ka surok, kata hadien ka jingdheng kali kaba jur bha kaba la jia ha ka surok national highway ha Elaka Narpuh, khamtam ha Ratacherra bad ha Malidor, ha kaba ki paidbah ba iaid na kane ka surok ki la sahkut haduh kumba lai- saw sngi ha surok, watla ki kali ki la lait suki suki ruh hynrei ka surok ka dang dap da ka khyndew ktieh bad ki kali ki hap ban iaid na ka surok kaba ktieh bad bun ki jaka kiba dang dap da ka jyrsieh ruh.
U Deputy Commissioner ka East Jaiñtia Hills District, u Abhilash Banarwal, u la iathuh ba kiba bun ki bynta kiba la jia ka jinghap ka khyndew la dep ban pynkhuid bad ki dang don ruh ki bynta jong ka surok kiba ym pat dep ban pynkhuid lut, la ong ruh ba na ka liang ki bor District bad ki bor pulit ki dang long peit ngor bha halor ka jinglong jingman ka surok na ka daw ba ka jinglong jingman ka suiñ bneng kam pat da biang bha.
Kat haduh ba thoh ia kane ka khubor, ki puh shi lum jong ka National Highway Authority of India ki dang treikam shaid shaid ban pynkhuid ïa ka surok ban weng ïa ki dieng kiba heh bad ki maw kiba la wan hap bad lynshop ïa ka surok.
