Ban shakri ïa ka bha ka miat ki paidbah, la pynskhem ïa ki nongïalam ka FKJGP Western Zone ha Ri Bhoi
Nongpoh, Risaw 21: Da ka jingangnud ban dang pynkhlaiñ ïa ka jingshakri bad ruh ban dang pynkhlaiñ ïa ki jingtreikam ka seng ban ai ka jingshakri sha ki paidbag, ki nongïalam ka Federation of Khasi Jaintia & Garo People (FKJGP) North Khasi Hills District mynta ka sngi Saitjaiñ ki la hiar sha ka thaiñ Western Ri Bhoi na ka bynta ban pynthymmai bad ban pynskhem ïa ki nongïalam ba pura ka FKJGP Western Zone ha Ri Bhoi.
Kine ki heh nongnïalam ka FKJGP, North Khasi Hills District Unit kiba la hiar sha Patharkhmah na ka bynta ban pynthymmai bad ban pynskhem ïa ki nongïalam katei ka Zone ki kynthup naduh u President, u Bah Luistar Lyngdoh, u General Secretary, u Bah Shanlang Diengdoh, u Senior Vice president, u Bah Lumlang Mawnai, u Education Secretary, u Bah Gabriel sun bad kynthup kiwei kiwei ki nongïalam bad ki dkhot ka seng na ka District.
Ïa kane ka jingïalang ban pynthymmai bad ban pynskhem ïa ki nongïalam ka FKJGP, Western Zone la pynlong ha Dorbar Hall ka shnong Patharkhmah bad la sakhi lang ruh da ka jingdon lang ki nongïalam ka KSU, RBYF na Western Ri Bhoi bad kynthup ruh ki riew rangbah na katei ka thaiñ.
Kine ki nongïalam ka FKJGP Western Zone ba la pynthymmai bad pynskhem mynta ka sngi ki kynthup ïa u President ba la jied ïa u Bah Centerwell Doloi, General Secretary, u Bah Birson Pohshna, Vice president, Alfred Lyngdoh lem bad kiwei kiwei ki nongïalam bad ki dkhot kane ka Zone.
Ha kane ka sngi kum u nonïalam ka FKJGP North Khasi Hills District, u Bah Luistar Lyngdoh nalor ba u la ai ka jingpynskhem bad ban pyntiar smai ïa kitei ki nongïalam ka seng, u la ai ruh ki kyntien sneng ki kyntien kraw ïa kine ki nongïalam ba thymmai ka seng ba kin shim ïa ka jingkitkhlieh kum kita ki nongïalam ban ai ka jingshakri kaba bha tam sha ki paidbah katei ka thaiñ.
Shuh shuh, u la khot la wer ruh ïa ki paidbah katei ka thaiñ ba kin ai ïa ka jingïatrei lang bad kine ki nongïalam ba thymmai ka seng ba ka jingthmu ba kyrpang ka seng ban sei ïa kine ki nongïalam ka long ka daw bah ban peit ïa ka eh ka shon ki paradoh ki parasnam bad khamtam ban wan rah ïa ka shongsuk songsain bad ka roi ka par ki poidbah ha katei ka thaiñ, u la bynrap.