Nongpoh, Lber 27: U Samla Felix Albert Nongsiej, uwei naki samla u ju ai mynsiem haki kam kilan met mynta ka sngi u la plie paidbah syndon da kawei ka jaka kilan met ne ka Gym kaba la ai kyrteng kum ka Alex Gym, join the fitness family hadien jong ka Miracle Plaza ha sor Nongpoh.
Ïa katei ka Gym la wan ban plie paidbah bad ai mynsiem da u Bah Mayral Born Syiem MLA ka Nongpoh, kum u kongsan haka jingdonlang u Fr Saulus Kharpran, Assistant Parish Preist ka Nongpoh Parish u ba la ai ka jingkyrkhu kyrdoh duwai shuwa ban plie ïaka, ryngkat ki riew rangbah naka thaiñ Nongpoh bad ki bahaiing hasem.
Katei ka Gym kadei ruh kaba don ïaki tiar lehkai katkum ka juk mynta, ryngkat ki jaka sum jaka sleh ban pynsuk ïaki nongïalehkai hadien ba kila dep ban lehkai.
Haba kren naki lad pathai khubor naka liang u Samla Felix Albert Nongsiej u la pynpaw ba katei ka dei ka jingangnud jong u kaba la slem, hynrei da ka jingtrei shitom katei ka jingangnud kala urlong mynta ka sngi.
U la ong ruh ba kum uwei naki samla ïalehkai um kwah ba ki samla kin ngop haki jingmlien ba sniew khamtam ha kane ka juk ba mynta ba kynrei ki kam sniew hynrei ban pynlut por tang 1 kynta ha Gym kan pynlait ïaki naki ba bun ki jingmlien ba sniew khamtam ban ioh ïaka met ka koit ba khiah bad lait naki jingpang.
