H a ka juk kyrduh kam mynta bun ki samla ki ïa ud ïa nam ba watla ki heh ka kyrdan katno katno ruh hynrei ki hap ban shong iing da kaba ong ba watla ki aplai da ki phew sien ban ïoh kam sorkar hynrei kim ïoh satia. Ym tang katta, kane ka pynbitar ruh ïa ki bad ka pynpyrkhat ba kadei ka jingshisha ba lada kim don ka jingïadei bad kita ki heh ki haiñ lane ki kynrem ki lyndan kin ym ïoh satia ïa ka kam kampher lada ki aplai kam da ki spah sien ruh. Kum kane ka rukom pyrkhat ba dei ban ïoh beit ïa ka kam sorkar ka la nang pynjaituh shuh shuh ïa ki khun samla wat ban trei ïa kiwei ki kam katba ki dang aplai ïa kata ka kam sorkar.
Da kaba pynkynmaw ïa uwei u rangbah uba la iehnoh ïa ka kam sorkar bad trei noh da ka kam lajong u ong ïa kine ki kyntien, ‘Ka jinglehraiñ bad ka jingkwah beit ban trei tang da ïoh kam sorkar kan sa pynduhja ïa ki samla jongngi’ – lehse ka long kaba jylliew bha bad kaba hap ban pyrkhat sani. Utei u rangbah u la ong ruh ba ki don bun ki samla Khasi kiba pyndep tang ïa ka Matrik ne klas 12 hynrei kim treh ban phaikhmat sha ka kam lajong pynban ki ap khmih lynti ïa ka kam sorkar.
Kaba kham sngewtynnad ka long ba u pynshlur da kaba ong ba ka jingwan kine ki lad kamai arshaka kadei ka sienjam kaba dei ban ïoh ïa ka jingïaroh namar ka pynplie ïa ki khmat jong ki samla ba lada kim lehrain katei ka kam ruh ka pynim ja ïa ki. Kadei ruh ka jingshisha ba mynta ki samla Khasi ki la shlur wat ban leit tyrwa shana kylleng kylleng kaba dei ka kam kaba kiwei ki jaidbynriew mynshwa ki bat la slem bha.
Ym tang katta, ki la don bun ruh ki samla kiba la mih mynta wat ban seng ïa kita ki resort ne ki hotel khamtam eh ha kito ki bynta ba bun ki jaka jngohkai pyrthei kum ha Sohra bad kiwei kiwei. Kine ki dei ki dak ba shynna ba ki samla Khasi ki dei ki ba donsap bha ha kaban seng kam lajong bad kylla long ruh ki nongai kam ïa kiwei pat ki samla.
Haoid kadei ruh ka jingshisha ba ym lah ban len ha kine ki sngi, wat ki samla kiba la nang la stad ki la hap ban shu shong khlem kam namar ka jinghiran ka ïohkam ïohjam. Katba nang mih ki snem ka jingjyllei ki samla kiba la nang la stad ka la nangjur. Ka jinghiran ka ïohkam ïohjam ha kane ka Jylla ka long ruh namar ba ka Jylla kaba rit ka bym don satia ïa ki karkhana ai kam kumba long sha kiwei kiwei ki jylla ha kaba ki samla wadkam ki kham ïabeh ban trei ha ki kompani namar ka jingsiew kaba heh watla ki hap ban trei shitom.
Lah ban ong, da ki hajar ngut ki samla na kane ka jylla kiba la hap ban jngai na la ïing tang namar ban leit wad jakpoh sha kiwei pat ki jylla namar ka jinghiran ka ïohkam ïohjam ha kane ka jylla. Lada kren pat ia ka jingshisha ka long kaba eh ba ka sorkar kan lah ban ai kam ai jam namar ba ka jingroi jong ka jingbun paid ka la nangkiew katba nang mih ki sngi bad ki por. Ynnai ïa kren lei lei ïa ka lawei jong ki khynnah pule kiba dang don ha ki skul ha kaba peit shi synpeit la i duh jingkyrmen, namar khamtam kum ha ka Nongbah Shillong bad wat ha ki jaka nongkyndong ruh ha kine ki sngi tang kawei ka skul pule ka la don da ki hajar ngut ki khynnah pule.
Ban ïakren lei lei ïa ki samla kiba la pyndep tang ïa ka degree ruh da ki phew hajar ngut ki dang don kiba shong khlem kam khlem jam ha kaba ka sorkar kam lah satia ban ai kam ai jam. Ka long shisha kaba shem jingeh ba baroh ki samla pule kin ïoh ïa ki kam sorkar kiba ha kine ki sngi tang ïa kawei ne ar tylli ki post ki nongthepkam ki la kot da ki hajar ngut. Tangba ha kawei pat ka liang, ka long pat kaba sngewsih ban ïoh sngew ne tip ba ka jylla jongngi ka dang duna ïa shibun ki samla kiba la pyndep ha kiwei pat ki kyrdan ha kaba dang don ki kam ba ki briew na ka jylla kim pat lah ban trei ha kaba la hap ban wan na ki briew kiba shabar ka jylla kaba buh ïa ka jingduh jingkyrmen ïa ki khun samla ka jylla.
Kumba ka long hi, bun ki kam kiba iadei bad ki kor ki bor haduh mynta hi ki dang bun ki briew kiba nabar kiba hap ban wan trei, kumta kane kadei ka dak kaba paw ba ki samla jongngi ki hap ruh ban peit ia kita ki jait kam kiba ki samla Khasi kim pat lah ban trei khnang ba kin ioh ban sdang bad ialam lynti ia kiba bun kiwei pat. Kane kadei ka juk kaba ym dei ban shu ia beh ban trei ia kaei kaba kiwei ki sdang hynrei ban pyrshang ban long nalade ki nongsdang ia ka kam. Kum ka nuksa lada shu peit mynta, ia ka dohkha ne dohsniang haduh mynta ka jylla kam pat lah ban pynbiang hi nalade hynrei la hap ban wanrah da ki spah bad ki hajar ton na shabar jylla kaba mut da ki klur klur tyngka ka pisa ka tuid shabar kum ka bai doh sniang bai dohkha. Kawei ka jingeh ia ki samla jongngi ka long ba ngi salia ba ngin phai biang sha ki shnong ki thaw hadien ba la pyndep ia ka jingleit pule namar ka jingkhmih lynti kalong beit tang ban ioh kam sorkar.
