Nongpoh, Lber 27: Ka Society for Action in Community Health (SACH) ha ka Lah Sngi u Blei ka la pynlong ïa ka prokram kyrpang ban lehkmen halor ka jinglah ban pyntreikam bha ïa shibun ki kam pynroi na ka bynta ki paidbah jong ki 20 tylli ki Shnong ba hap ha Umsnning C&RD Block ha Ri Bhoi District.
Ïa kane ka jingrakhe ïa ka prokram lehkmen la pynlong ha shnong Syadrit, ha kaba u Deputy Commissioner ka Ri Bhoi, u Abhilash Baranwal u la wan ban shim bynta kum u kongsan ryngkat ki nongmihkhmat na ka SACH, HDFC Bank, Nongpoh bad ki paidbah nongshong shnong.
Kane ka jingrakhe ka dei halor ki kam pynroi ba la pyntreikam lyngba ka Human Resource Development Program (HRDP), kiba dei ki kam pynroi kiba pynkupbor ïa ki shnong ki thaw halor ki kam pynroi na ka bynta ban kyntiew ïa ka ïoh ka kot bad ka roi ka par hapoh ki shnong nongkyndong.
Kine ki kam pynroi ba la pyntreikam ha kitei ki 20 tylli ki shnong ki kynthup kum ka lad ai jingïarap ha kaba shed jingbam, ka jingthung Tit bad kiwei kiwei ki kam pynroi ne ki prokram ai jinghkai kiba kyntiew ïa ka ïoh ka kot ki nongshong shnong.
Haba phai halor kane ka projek ne ki kam pynroi, u Deputy Commissioner ka Ri Bhoi, u Abhilash Baranwal u la plie paidbah ruh mynta ïa kawei ka Restaurant ba la kyrshan da ka HDFC Bank bad ka jingplie ïa kane ka Restaurant ka long ban ai lad ha kaba kyntiew ïa ka ïoh ka kot ki nongshong shnong.
Kiwei kiwei kiba la ïa don lang ha kane ka sngi ki kynthup ïa u Bah Bah Lumlang Nongsiej, Block Mission Coordinator; u Nandita Das, Project Manager ka HDFC Bank CSR; u Branch Manager ka HDFC Nongpoh Branch u Bah Jayanta Mudoi, ka Assistant Branch Manager ka HDFC Nongpoh Branch ka Kong Ibadahun Kharkongngor, u Bah Nathaniel Nongrum, Rangbah Shnong ka Syadrit lem bad kiwei kiwei ki nongmihkhmat na ka HDFC bad SACH ha ryngkat ka jingdon lang ki nongshong shnong.
Kum ban pynpaw paidbah, kane ka prokram ka long kyrpang ban pynkup bor ïa ki shnong ki thaw lyngba ka jingpyntreikam ka SACH ïa ka Human Resource Development Program, kiba dei ki kam pynroi ban kyntiew ïa ka ïoh ka kot ki paidbah hapoh ki shnong nongkyndong.
