Ban ïa im lang, rai ïatreilang ki nongri bad nongkhaïi syiar ka jylla

Nongpoh, Lber 05: Hadien ka jingud jingnam jong kiba bun ki nongri syiar haka jylla khamtam naka thaiñ Ri-Bhoi District naka jingshah khñiot palat ka dor bad bun naki nongri syiar kila hap ban kynran dien noh wat ban khang khyrdep syndon ïaki sem syiar, ki nongri syiar hapoh ka lama jong ka Meghalaya Poultry Farmers and Welfare Association lem bad ki nongkhaïi syiar hapoh ka lama ka Meghalaya Poultry Supplier and Retailer Association mynta ka sngi kila pynlong da ka jingkynduh lang ha Nongthymmai, Umsning ban ïathir ïatai khamtam ha kaba ïadei bad ka jingshah khñiot beiñ ka dor ki nongri syiar ha kane ka jylla kaba dei nakadaw ka jingwan tuid palat ki syiar nabar jylla.
Kum ban shu kdew hangne ba naka liang ki nongri syiar dang ha kine ki khyndiat sngi kila hap ruh ban mih sha surok namar ka jingtuid palat ki syiar nabar jylla, katba ki syiar na kane ka jylla ki sahkut ha ki sem syiar namar ki nongri kim nud ban pynlait naka jingshah khñiot palat ka dor haki nongkhaïi, dei halor katei ka nongrim kum ki nongri bad ki nongkhaïi syiar mynta ka sngi kila lum lang da ka jingïalang ban mir jingmut khamtam ban don ka jingïatreilang bad ka jingsngewthuh jingmut ban pynlut shuwa ïaki syiar ba ri hi naka jylla lajong shuwa ban shim ïaki syiar ba wan nabar.
Lah ruh ban kdew hangne ba ka jingtuid ki syiar nabar ka long ka jingduhnong ïa kiba bun ki nongri syiar ha kane ka jylla namar ki syiar ba wan nabar ki long kiba tad, bad bunsien ki nongkhaïi ki beh ïaka dor kaba tad, katba ki syiar kiba ri hi ki nongri na kane ka jylla kim lah ban ai kajuh ka dor namar ka jingrem jong ki jingbam, ki symbai syiar bad kiwei kiwei.
Hadien ka jingïatai bad ka jingmir jingmut kaba la neh kham slem naka liang ki nongïalam naduh u Bah Daminot Sylliang nongïalam ka seng ki nongri syiar bad kumjuh ruh u Bah Everest Mylliem Umlong nongïalam ki nongkhaii syiar kila pynpaw ba katei ka jingkynduh ka long kaba seisoh ha kaba la lah ban wanrah ïaka jingsngewthuh jingmut bad ban im lang ki nongri bad nongkhaïi syiar, kila shim ruh ka rai ban ïatreilang ban pynlut lang ïaki syiar ba ri da ki nongri shuwa ban shim ïaki syiar ba wan nabar bad dawa ruh naka sorkar ba ka dei ban buh khyrdop ban peit bñiah ïaka koit ka khiah ki syiar ba wan nabar naka bynta ka jingshngaiñ jong ki nongbam doh syiar.