Nongpoh, Kyllalyngkot 07: Ha kawei na ka jingjia kaba sngewsih kaba la jia ha Ri Bhoi, kumba 10 tylli ki dukan paidbah ha kawei ka ïew kaba don ha ka Shnong Baridua ki la shah bamduh noh ha ka ding ba shyrkhei, kaba la jia mynta ka step ha ka por 4 baje ei ei mynstep.
Kane ka jingjia ka la jia ha ka Shnong Baridua ba hap ha ka Khanapara Police Station bad ha kane ka jingjia ka ding ka la ioh ban bam duh palat 10 tylli ki dukan paidbah, ha kaba kane ka dei ka ïew paidbah kab don ha katei ka shnong ba la ju pynlong iew da ki paidbah ha katei ka thain Baridua, Khanapara.
Kumba la ïathuh da u Rangbah Shnong ka Shnong Baridua, u Bah Augustine Nongrum, la ong ba kane ka jingjia ka la jia ha ka por mynstep ha kaba bun na ki paidbah ki dang ioh thiah lyngngai ha la ki ing ki sem bad dei namar kane ka daw ka ding ba shyrkhei ka la ïoh ban pur sha kiwei ki dukan, namar ha katei ka iew ki dukan paidbah ki don mar syndah bad kaba shem jingeh ruh ban pynlip noh ïa ka ding ba ka ding ka la ioh ban klang sha baroh ki bynta jong ka dukan.
U la ïathuh ruh ba ïa ka daw tynrai ba kane ka iew paidbah ka la pluh ding ym lah ban tip bad katkum ba la ioh lum jingtip la ong ba ki don kiba ong ba ka dei ka jingbthei ka bording ilektrik bad ki don pat kiwei kiba ong ba ka dei ka jingbthei ka cylinder gas ba shed jingshed.
U la ong ruh ïa ka daw tynrai hi haduh mynta ym lah ban tip halor ka jingpluh kane ka iew bad kum ki bor shnong bad wat ki bor pulit ruh ki dang pynlong ïa ka jingtohkit ban tip ïa ka daw tynrai jong ka jingpluh kane ka dukan.
U la ïathuh halor kane ka jingjia, kito ki trai dukan kiba la shah ktah ha kane ka jingpluh ding ki la shah ktah jur, namar baroh ki tiar ki tar ba ki die bad kynthup kiwei kiwei ki tiar ki la shah bamduh ha ka ding haduh ba jan baroh ki dukan ki la kylla dpei.
Shuh shuh, u la ïathuh ruh la lah ruh ban pynlip ïa ka ding da ka jingwan poi ki Kali pynlip ding na Assam bad kumjuh ruh na Byrnihat bad wat la katta ruh namar ba la slem ka jingwan poi kine ki kali pynlip ding kiba bun ki nongshong dukan kiba la shah ktah ki la duh nong da ki phew phew lak tyngka ba ka ding ka la bam duh ïa baroh ki tiar dukan ba ki buh ha ki dukan jong ki, u la bynrap.
