Da u mot sahkynmaw ka ‘Syiem Latympang’ tei ka kur Shadap Manar halor u Lum Tiniang Mowtyrshiah

Jowai K’Lyngkot 07 : Ka Dorbar Pyllun ba 20 jong ka Kur Shadap Manar kaba la long ha ka 29 Nohprah 2022 haka Shnong Mowtyrshiah halor u Lum Tiniang, ka long shisha ka prokram kaba kongsan bha mynta u snem hadien ar snem ba la pynlong biang ïa ka namar ka jingwan lyngshop ka khlam Covid-19.
Ha katei ka sngi la ïoh ruh ban plie ïa u mot sahnam ka Syiem Latympang Shadap Manar halor jong une hi u Lum ba pawnam. Kum ban pynkynmaw ka Syiem Latympang Shadap Manar kala long ka Syiem ba pawnam bha jong ka Hima Manar ha Ri-Lum Jaiñtia ha ka Spah snem ba 17 HK.
Ha kane ka sngi la plie ïa une u mot sahnam da u kongsan ma Wilson Shadap Manar, IFS Chief Conservator of Forest, ka sorkar jylla, ha ka jingïadon lang ka Symbun Kongsan kong Rimaya S Manar MCS ADC East Khasi Hills, u President ka Kur ma Herlington Shadap Manar, General Secretary ma Goldwin Shadap Manar, u MDC ka thaiñ ma W.G. Sungoh na ka shnong Mowtyrshiah hi, u Waheh Shnong Mowtyrshiah ma H. Dkhar, ki dkhot E/C lem bad ki hajar ki paid ka Kur Shadap Manar kiba wan na kylleng ka Ri-Lum Jaiñtia.
Hadien ka jingplie ïa u mot dur (Statue) la ïoh ruh ban pynlong ïa ka General Meeting ka Kur, ha ka juh ka por ka kur kala sam ruh ïa ki khusnam Award sha ki khun jong ka Kur Shadap Manar kiba wan shakhmat ha ka jingpule jong ka Batch 2020, 2021 bad 2022.
La pynphuh pynphieng shuh shuh ïa kane ka jingïalang da ki jingrwai bad jingshad na ki Unit bapher bapher kiba don hapoh ka Seng Kur Shadap Manar lem bad ki jingrwai ba sngewbang kiba la pynkynmaw ïa ka mynsiem ba shlur jong ka Syiem Latympang.