Leh burom ka AJMRW&LLU Thadlaskeiñ Block bad ki nongshet ja PM-POSHAN ïa u ma K Pariat

Jowai, K’Lyngkot 07: Ka All Jaiñtia Muster Roll Workers & Labour Union, Thadlaskeiñ C&RD Block ha kane ka 5 tarik mynta u bnai shi bynta na ka jingdap 4 snem ka Block kala pynkup burom ïa u ma Khroo L Pariat, u nongaibuit ai budia ba hakhmat eh jong ki nongtrei bylla sngi kiba don ha ki tnad sorkar bapher bapher hapoh ka Ri-Lum Jaiñtia.
Katba na ka liang ki nongshet ja sngi Cook cum Helper – PM POSHAN jong ka Ri-Bhoi District, mynta ka sngi 7 tarik ha ka jingïalang kaba la long ha St. Paul Parish ha Nongpoh Ri-Bhoi District, kila pynkup burom ïa u ma Khroo L Pariat uba long ha ka juh ka por u nongkyrshan ka All Jaiñtia Mid Day Meal Workers Union uba ïakhun ban dawa pynkiew ïa ka honorarium jong ki nongshetja sngi ha ki school hapoh ka jylla,
Ha Thadlaskeñ la wan shirhem sha ka jingïalang haduh 300 tam ki nongtrei bylla sngi (Muster Roll) na ki tnad sorkar kiba hap hapoh ka Thadlaskeiñ C&RD Block.
Ïa ka jingïalang la pynïaid da ka kong Mary Shangpung, Treasurer, AJMW&LU Thadlaskeiñ Block. Ha kaba u ma Fourme Dhar ula long kum u kongsan bad ula kyntu ïa nongtrei bylla sngi ba kin long kiba trei shitom ha ka kam bad ban khanglad na ka jingwan tuid ki briew ba nabar kiba thmu ban wan trei ha ka dor kaba rit.
Na ka liang u ma Leyo Laloo Waheh Chnong ka Dorbar Chnong Ummulong kum u riew shemphang ula pashet ïa ki kyntien shong sbai sha ki nongtrei bylla sngi ba kin long kiba ïa tylli bad kiba ïatreilang khnang ba ka seng kan long kaba khlaiñ bor hada don kino kino ki jingdawa na ka bynta ka hok jong ki.
Ka kong Dayoowanphi Iakai, President ka AJMW&LU seng kmie kala ïathuh shaphang ki kam kiba u ma K. L Pariat ula dep ban synñiang ha ka imlang ka sahlang naduh ka rukom pynbha ïa ka rukom treikam ka MPSC da kaba ujor shaduh ka High Court Meghalaya, ka rukom pynbha ïa ka jinglong khuid jong ka Wah Myntdu bad ka rukom sam umbam sha ki thliew ïing lyngba ka tnad PHE ha Jowai, ka jingïaleh ban kyntiew ïa ka bai nong ki nongshetja sngi ha ki School (MDM Cook cum Helper) bad kiwei de.
Katba na ka liang u ma Khroo L Pariat kum u Adviser ka AJMW&LU (CEC) haba ai jingkren sha baroh ki nongtrei bylla sngi ula kren halor ka phang kaba ong “lehbha ïa kiwei bad ïarap kylliang ïa ki para briew”, ha ka juh ka por u buh ka jingkyntu ïa ki Waheh Chnong ba kin ïarap ban pynïoh Ration Card salonsar ïa baroh ki nongbylla sngi lyngba ka tnad Supply ka sorkar, kumjuh ruh ïa ki nongrep.
Ha kane ka sngi la ïoh ruh ka jingkren na u ma Dapherborn N Suchiang General Secretary, u Waheh Dong Lumtrep, Nongjngi ma Ebor Pale, na u ma Dathrang ki Lakiang President ka AJMW&LU Thadlaskeiñ Block katba ïa ki kyntien khublei la ïoh na ka kong Elangki Pariat kaba long ka General Secretary, Thadlaskeiñ Block.