Ba wanrah burom ïa ka distrik, pynkup burom ka SWKHDVA ïa ki ‘rang bad ki ‘thei ïalehkai volleyball

Mawkyrwat, Rymphang 27 : Kum ka dak jong ka jingburom ïa ki nongïalehkai volleyball jong ka South West Khasi Hills District kiba la mihkhmat ha ka 5th Meghalaya Games 2024 kaba la long dang shen ha Tura, na ka liang ka South West Khasi Hills District Volleyball Association (SWKHDVA) ka la pynlong ïa ka prokram pynkup burom ïa ki hapoh ka Community Hall, Mawkyrwat ha kaba u bah Renikton Lyngdoh Tongkhar, MLA ka Mawkyrwat Constituency u la long kum u kongsan.
Lah ban kdew ba ha kane jingïalehkai volleyball jong ka 5th Meghalaya Games 2024 na ka liang ki kynthei ki la rah ïa ka nam jop ryngkat ka khusnam da ka takma ksiar katba ki shynrang pat ki ïoh rah ïa ka khusnam da ka takma rupa.
U bah Renikton Lyngdoh Tongkhar haba kren kum u kongsan u la ong ba ha ki jingïalehkai bapher bapher, marwei u ‘rangïalehkai un nym poi shaei shaei hynrei kaba donkam ka long ka jingïakyrshan lang jong ki nongïalehkai hapoh ka kynhun. Haba kren ha kaba ïa dei bad ki sap ki phong ba U Blei U ai, u bah Renikton u la ai mynsiem ïa ki nongïalehkai kiba don shisha ïa kata ka sap kyrpang ba U Blei U ai ba kim dei ban pynleh noh ei hynrei ki dei ban pyndonkam hok ïa ka khnang ba kan long ka jingmyntoi ha ka jingim jong ki.
U la ong ruh ba watla ka dang long ka distrik kaba rit, hynrei ha kaba ïa dei bad ki jait jingïalehkai pat ki khun samla ki la sei shisha ïa kita ki sap jong ki ban mih sha lympung ban ïa khun bad ha kane ka jingïalehkai volleyball watla ka dang long kaba nyngkong ha kane ka Meghalaya Games hynrei ki samla shynrang bad kynthei ki la pyni bad ïalehkai bha da kaba ki la wanrah ruh ka jingjop.
“Nga la kren ruh hapoh Assembly ba ka South West Khasi Hills District ka dei kawei na ki distrik kaba ju pynmih ïa ki nongïalehkai kumta ka don hok ruh mynta ban don noh ïa ka Sports Complex kaba pura khnang ba kan long ka jingïarap ïa ki nongïalehkai”, pynpaw u bah Renikton da kaba kular ruh ba ym tang ba u kren tang da ka ktien hynrei un sa bud-dien ba ka jingthmu baroh kan urlong.
Namarkata, lyngba ka jingkren jong u, u la ai mynsiem ïa samla kiba don ki nongïalehkai ba kin pyrshang ban don ha baroh ki jait jingïalehkai khnang ba kan long ka jingïarap namar kumba ka long haduh mynta kum ka South West Khasi Hills District ka don tang 11 tylli ki jait jingïalehkai.
U la pynkut ïa ka jingkren da kaba ula ai ka jingkitbok kit-rwiang ïa ki ‘rang bad ki ‘thei ïalehkai volleyball kiba la wan rah ka nam ka burom ïa ka distrik ba nangne shakhmat kin sa nang ïalehkai kham bha shuh shuh ba kan long ka jingmyntoi ïa ki hi bad kumba ka long mynta haduh 5 ngut na kane ka South West Khasi Hills District ki la shah jied ban leit sha ka jingkilanmet da ka Meghalaya State Volleyball Association (MSVA).
Ki nongkren ha kane ka sngi ki kynthup ïa u bah Y.G. Lyngdoh, Working President jong ka Mawkyrwat District Sports Association (MDSA), ka kong Insyrpaihun Kharlyngdoh kawei na ki ‘thei ïalehkai Volleyball bad na u bah Elevenson Wanniang, President ka Volleyball Association.
Lah ruh ban kdew na ka liang ka Meghalaya State Volleyball Association (MSVA) ka la jied ruh ïa ki ‘rangïalehkai kiba na kylleng ki distrik hapoh jong ka Meghalaya ha kaba 5 ngut na ki ki dei napoh jong ka South West Khasi Hills District kita ki long u Pynsuklang Lartang, u Ksankupar Wanniang, u Hillarius Shylla, u Banteilang Wanniang bad u Wadborlang Mylliem.
La pynïaid ïa ka jingïalang da u bah Forwardman Nongrem, Vice President jong ka South West Khasi Hills District Volleyball Association (SWKHDVA) bad uba la ai ruh ki kyntien pdiang sngewbha bad ka jingkren khublei na u bah Downing Marweiñ, Finance Secretary jong ka South West Khasi Hills District Volleyball Association (SWKHDVA).