Ym donkam rah pla kot sha skul ha ki sngi ba la pynbeit : Jubab u Myntri ha ïing Dorbar

Shillong, Rymphang 26 : U Myntri ka tnad Pule Puthi ka sorkar jylla, Rakkam A Sangma ha ka sngi Nyngkong u la pyntip ha Ïing Dorbar ba ka tnad pule puthi kum shi bynta ka jingpyntreikam ïa ka National Education Policy (NEP) 2020 ka la bthah ïa ki skul ba ha ki sngi ba la buh , ki khynnah ki lah ban leit sha skul khlem donkam rah ïa ki pla kot.
Haba jubab halor ka call attention ba wanrah da u MLA ka VPP na Shillong North, Bah Adelbert Nongrum na ka liang u Myntri ula ong ba ha kitei ki sngi, ki khynnah ki lah ban shim bynta bad nang ïa kiwei pat ki bynta jong ka jingpule.
U ong ruh ba la ai bor ha ki skul ïa ka thup jong kita ki ‘10 sngi ban ym rah pla kot’. Mynta ka shong ha ki skul ban rai ha kano ka sngi ba ki kwah ban bud ïa kine ki sngi.
“La khot ruh ïa ka jingïasyllok ba ka jingpan jingmut halor kane. Ka jingai jingmut ba ïoh na kane ka long ba ha ka snem long skul dei ban pyllait lang ïa kane kham hashwa khnang ba ki skul kin lah ban pynkhreh. Kumta, ïa ka snem long skul jong u 2025 (school calendar 2025) yn sa pynbna noh ha u Naiwieng jong une u snem hi,” u la ong.
U ong ruh ba ka school calendar ka long ban long ban long salonsar lut haba ïadei bad ka jingsdang ïa ki skul bad ka jingpynkut ïa ka snem long skul kumba la kdew katkum ka RTE Act.
Shuh shuh u ong ruh ba ka jingtip kiba bniah na ka bynta ki kyndon (SoP) ban pyntreikam ïa ki sngi ban ym rah pla kot sha skul yn sa kdew lang ha ka notification.
Nalorkata, u Myntri u la ong ruh ba ka tnad ka pynshlur ruh ïa ki skul ba kin shim ïa ki sienjam ban pyntikna ban jam shakhmat katkum ba la kdew ha ka NEP 2020.
Haba kren halor ka jingkiew bai skul ha ki skul sorkar ne ki skul ba kyrshan da ka sorkar, u Myntri u la ong ba ki la don ki kmie ki kpa kumjuh ki khynnah kiba wan ban ïa kren halor kane.
“Ka sorkar Meghalaya ka la thaw ïa ka Meghalaya State Education Commission bad ka dang bishar bniah ïa kine baroh. Kane ym dei tang ha ki skul hynrei ha ki kyrdan kiba kham heh kum ha ki college, ki university kiba ka jingsiew ka ïapher bha,” u la bynrap shuh shuh.
U Myntri u ong ruh ba ka sorkar kan sa thaw ïa ka komiti ban peit bniah halor kane bad mynta ki dang ap shwa ïa ka Education Commission ban ai ïa ki jingai jingmut bad ki jingbthah halor kane.
“Ka sorkar kan sa bishar bniah ïa kane ha ki lai bynta jong ki skul, kata ha ki skul sorkar bad ha ki skul ba kyrshan da ka sorkar,” u la bynrap shuh shuh.