Shillong, Rymphang 26: U Myntri Rangbah, u Conrad Sangma, u la ïathuh ha ïingdorbar Thawaiñ mynta ka sngi, ba ka sorkar ka la pynmih haduh 2.3 lak tylli ki kam tang ha kine ki lai snem bala leit noh bad ka don jingthmu ban pynkha sa 1 lak tylli ha kine ki shisnem ban sa wan.
U Myntri Rangbah u la ïathuh ruh ba ka jingbym ïohkam ha Meghalaya mynta ka long 3%, kaba duna ïa ka National average ba kpt 4.7%.
Ula ong ba ka Sorkar Jylla kala pyntreikam ïa ki skhim/prokram bapher bapher ban plie lad ïa ka ïoh kam ïohjam ïa ki nongshongshnong. Kine ki kynthup ïa ka MGNREGS, CM-Elecvate, PRIME Program, FOCUS, FOCUS+, ki Mission ha ka rep ka riang, ka Meghalaya Grassroot Music Project, Chief Minister’s Youth Centre, National Rural Livelihood Mission bad ka Skill Meghalaya.
Haba pynpaw ba ka Sorkar kala buh ïa ka thong ban pynkha haduh 5.5 lak ki kam ha kine ki san snem ban wan, u Myntri Rangbah ula ong “Lada shu khein malu mala, ngin pynkha kumba 1 lak ki kam ha une u snem ban wan”.
Nalor kane, u Myntri Rangbah ula pyntip ba palat 3000 tylli ki kam la pynkha ha ki kam Sorkar bad kine ki kynthup ïa 500 tylli ki kam doktor bad 30 ki nos bad technical staff lah dep ban thung hapoh ka Tnad ka Koit ka Khiah, 1000 tylli ha ka tnad Pulit bad 1000 tylli ha ka kam nonghikai.
Hynrei ula ong ba nalor kane, la pynkha ruh ïa ki kam ha ki District hynrei ym don jingkhein pat katno tylli ki don.
Nalor kane, u Myntri Rangbah ula pyntip ba ka Sorkar kala buh ïa ka thong ban pynkha ïa palat 2.5 lak ki kam ha ka kam rep kam riang ha kine ki 4-5 snem ban wan.
Ula ong ba ka NRLM kala dei ka model ba jop ha kine ki san snem bala leit noh ha kaba ka Sorkar kala lah ban pynkha ïa 1 lak ki kam na ka bynta ki kynthei bad kan pynkha ruh sa 1 lak ki kam ha kine ki 4 snem ban wan bad bynrap ba ha ka Skill Meghalaya, 1.2 lak ngut ki briew kila ïoh jinghikai pyntbit ha kaba 50% kin sa ïoh kam.
Ula ong ba ka kam jngoh kai ruh kan aikam ai jam ïa kumba 50,000 ngut katba ka CM-Elevate kan pynkha ïa palat 50,000 tylli ki kali bad ka IT kan pynkha 20,000 ki kam. Sa 10,000 tylli ki kam kin long ha ki prokram bapher bapher ka Sorkar.
“Kumta, ngin sa kynjoh ïa ka 5.5 lak ka jingpynïoh kam ha kine ki san snem ban wan” bynrap u Conrad.
Kane ka jingïathuh u Conrad ka long halor ka jingkylli ba la wanrah da u MLA ka Congress na Nongstoiñ, u Bah Gabriel Wahlang.
Haba ïadei bad ka jingthungkam da ki District Selection Committee (DSC), u Myntri Rangbah ula ong ba kam long satia kaba shisha ba ki DSC kin shym la khot thep kam namar kila pynïaid beit ïa ka jingthungkam watla kam dei eh kaba bun.
