Donkam ban don ka aiñ ban tehlakam ïa ki youtuber ba ïalam bakla bad pynthohbria : MLA Nongpoh

Shillong, Rymphang 26 : U MLA ka Nongpoh, Bah Mayralborn Syiem ha ka sngi Nyngkong u la kyntu ïa ka sorkar jylla ba kan pyntreikam noh da ki kyndon na ka bynta ban tehlakam ïa ki youtuber kiba pynphriang ïa ki khubor ba bakla da ka jingthmu ei ei sha lyndet.
Ïa kane u MLA u la pynpaw haba wanrah da ka zero hour notice ha Ïing Dorbar halor ka jingjia shah pynthohbria jong u nongïalam ka Synjuk Ki Rangbah Shnong Ri Bhoi (SRSRB), Bah BB Makdoh ha kawei ka youtube channel kaba ai da ka khubor bym dei.
“Nga kyntu ïa ka sorkar jylla ba kan pyntreikam noh da ki kyndon ban aibor ïa ka sorkar ban tehlakam ha ka rukom ai jingtip kiba bakla sha ki paidbah khnang ba kum kito ki youtuber kiba don ka jingthmu ba sha lyndet bad kito ki briew kiba shna ïa ki khubor bym dei kin ngat,” u la ong.
Shuh shuh da kaba ong ba katei ka zero hour notice kam dei ban pynjah burom ïano ïano, u MLA u la ong ba la ïohi mynta ïa ka jingmih ki youtuber kum ki tit. “Ka jingjïa pyrshah ïa u chairman kam dei satia ban jia. Ka long kaba sngewsih ba ïa ka burom jong u briew yn pynthohbria da kane ka rukom,” u la bynrap shuh shuh.
Nalorkata, u Bah Mayral ula ong ba ki don ar jait ki youtuber, kata kiba pyndonkam hok ban ai ka jingtip kaba shisha sha ki paidbah kaba long ka jingïarap na bynta jong ki bad don pat ki jait youtuber kiba pyrshang ban shim kabu ïa ki jingjia tang ban pynsngewbha ïano re.
“Ka long kaba sngewsih ban ïohi mynta ki por, ngam ong ïa baroh hynrei ki don khyndiat kiba la tam pud tang na bynta ka khubor ba ïoh jingsiew, ki klet noh ba ka don ka pyrthei shabar ka social media, youtube. Don pat kiba trei na bynta jongno re ban pynjah burom.”
Haba jubab halor kane, u Myntri Rangbah ka Jylla Conrad K Sangma u la ong ba ïa kito kiba leh ïa kane ka kam ki la shah khot hajri ha Nongpoh Police Station bad ïa ka video la dep ban weng noh na youtube.
U Myntri Rangbah u la ong ruh ba ha ka juk social media lah ban pynïasoh bad ka pyrthei baroh kawei hynrei ka long ruh kum ka rynsan ban pynphriang ïa ki khubor lamler, ne ki jingthoh ba ïalam bakla kaba la pynlong ïa ka tnad pulit ban sngewkhia bha.
La ïathuh ruh ba ka la thaw Cyber Crime Wing ban ïakhun ïa kane bad ban peitngor ïa ki kam leh thok lyngba kine ki kor ki bor ka juk mynta bad ruh ban ai jinghikai ïa ki paidbah ha kane ka juk internet.
U Myntri Rangbah u la pyntip ruh ba naduh u snem 2019 haduh u Kyllalyngkot 2024 ki la don haduh 42 tylli ki jingjïa ba la rejistar ha ka cyber crime police station.
U kyntu ruh ïa nongpyndonkam ïa ki social media ba ki dei ban da pyntikna ïa ka tynrai ha shwa ba kin thep ha ki rynsan social media.
Shuh shuh u la ong ba u la shim ruh ïa ka jingai jingmut jong u MLA ban don noh da ki kyndon ban teh lakam ïa kine baroh.