Shillong, Rymphang 26 : U Myntri Rangbah ka Jylla Conrad K Sangma ha ka sngi Nyngkong, ula pyntip ba shen ka Sorkar kan sa pynmih ïa ka jingpynbna halor ka jingpynjlan ïa ka rta thungkam ha ki saw tylli ki tnad treikam ka Sorkar.
Kine ki kynthup ia ka Home (Police), Execise Registration, Taxation and Stamps, Home Guards bad Civil Defence lem bad ka Tnad Forest & Environment.
Haba jubab ïa ka mat ïatai ba lyngkot ba la wanrah da u MLA ka VPP na Mawlai, u Conrad ula ong “Ka kynhun Myntri kaba shong jingïalang ha ka 24 tarik Kyllalyngkot 2024, ka la mynjur ïa ka jingtyrwa ban buh noh da u pud ba rit eh bad ba heh duh ka rta ha ka jingthungkam ha ki 4 tylli ki tnad. ïa ka jingpynbna paidbah yn sa pynmih noh shen”.
Ula ong ba kat kum ka office memorandum ba 11 tarik Jylliew 1973, ka rta ba heh duh ban rung kam Sorkar ba la kyntiew na ka 25 sha ka 27 snem la nang pynjynsur shuh shuh sa 5 snem na ka bynta ki nongwadkam kiba dei ki Scheduled Tribe bad Scheduled Caste.
U Myntri Rangbah ula ong ba ka Sorkar na ka por sha ka por ka la ïoh ïa ka jingtyrwa ban kyntiew ïa ka rta thungkam na ki tyllong bapher bapher bad haba shong bishar bha, ka Tnad Personnel & AR (A) lyngba ka Office Memorandum ba 3 tarik Rymphang 2022, ka la pynmih ïa ka jingpynbna ban pynheh ia ka rta ba hehduh ban ïoh kam Sorkar na ka 27 sha ka 32 snem bad pynjlan sa 5 snem ia ki nongwadkam kiba dei ki Scheduled Tribe bad Scheduled Caste.
