Ba ka ktah ïa ka pla tyngka ym lah ban thung da kawei ka tnad kyrpang ban peit tang ïa ki surok

Shillong, Rymphang 26 : U Myntri Rangbah ka Jylla, Conrad K Sangma ha ka sngi Nyngkong u la ong ban thaw da kawei pat ka tnad ban peit kyrpang tang na ka bynta ka jingpynbha ïa ki surok kan sa ktah ïa ka pla tyngka jong ka sorkar.
Haba jubab halor ka motion ba wanrah da u MLA ka UDP na Mawkyrwat, Bah Renikton Lyngdoh Tongkhar, u Myntri Rangbah u la ong, “Ban thaw da kawei pat ka tnad ba thymmai lane don la ka jong ka agency ban peit ïa ka jingpynbha ïa ki surok kan sa ktah jur ïa ka pla tyngka jong ka sorkar namar ïa ka Agency Charge ruh hap ban pynrung ha ka mangtyngka.” U ong ruh ba lada leh kumta, kan sa long kumba knieh noh ïa ka kam ba la aiti ha kito ki engineer kiba la don ha ka department.
Da kaba pynpaw ba ka sorkar ka la nang pynkhlain bad pyndonkam shwa ïa ki nongtrei kiba la don lypa ha ka tnad, u ong ruh ba ka sorkar ka la nang kyntiew mynta ïa ka mangtyngka man u snem ban ïakhun ïa kitei ki jingeh.
U ong ruh ba ïa ka Monitoring and Evaluation Branch jong ka tnad Public Works Department (Roads) la pynkupbor ban ïarap bad treilang haba ïadei bad ka kam ban pynbha ïa ka RAMS.
Shuh shuh u la ong ba ka pisa ba la mang na byna ban pynbha ïa ka surok na bynta ka samoi treikam 2023-24 katkum ka mang tyngka ka long 414.213 klur kynthup ïa ka 75 klur hapoh ka Central Road Fund, 6.00 klur na bynta ban pynphah ïa ki National Highways bad 50.00 klur ban pynbha ïa ki surok PMGSY.
Shuh shuh u ong ruh ba na kane ka pisa, kumba 113.21 klur yn pynlut na ka bynta ka tulop ïa ki nongtrei bad ki muster roll. Kumta, u ong ba ka pisa kaba sah na bynta ban pynbha ïa ki surok ka long sa 170 klur tyngka.
U ong ruh ba ka jingdonkam pisa na bynta ban pynbha ïa ki surok katkum ki kyndon jong ka Ministry of Road Transport & Highway ka long 484 klur tyngka katba ka pisa kaba don na bynta ka samoi treikam jong u 2023-24 ka long tang 170.00 klur tyngka.
Nalorkata, u ong ruh ba ka jingbym dap ka pisa ka khanglad ïa ka tnad ban pynthymmai ïa ki surok ban pyntikna ba kin kham neh slem.
Haba ïadei pat bad ki jingkieng dieng (semi permanent timber bridge) u la ong ba ka long kaba donkam ban leh kyrkieh noh khnang ban khanglad ïa ka jingthut ka leit ka wan ki kali.
Nangta u ïathuh ba ka jingmaramot ïa ki surok na ka bynta ban pyntikna ïa ka jingshngain ïa ka jingim bad ka jingdon jingem ki nongshong shnong bad ruh ba kan ym don ka jingthut ia ka leit ka wan ka la dei ka dawbah ba ki sahkut khlem pat lah siew haduh 582.00 klur tyngka ka bill jong ki kontraktor haduh ka 01.07.2023.