Nongpoh, Rymphang, 25: Kum u riew rangbah ha kaba wat lada um don ïa ka jingnang jingstad kaba u hap ban pyndap jakpoh tang da ki kam bylla, hynrei ka kam kaba u trei la dei ban ai jingïaroh ha kaba ym tang ba u ïoh kam ïoh jam bad u long ruh uwei na u nongshong shnong uba don bynta ha kaba ïada kyrpang ïa ka mei mariang.
Une u samla rangbah la tip kyrteng kum u Bah Arjun Nongshli bad u shong u sah ha ka Shnong Pahamsyiem ha Ri Bhoi.
Haba phai sha ka jingim jong une u rangbah, kiba bun lehse ki nongshong shnong kim poi pyrkhat ba u leh ïa kawei na ka kam kaba khraw kaba u dei ban ïoh ïa ka jingïaroh, hynrei bun ki klet namar ba u dei u rangbah uba duna ha ka jingnang jingstad bad u pynim jakpoh ïa lade tang ka kam bylla sngi.
Kumba la lap da u Mawphor, u Bah Arjun Nongshli, u dei uwei na u rangbah uba trei shitom bad uba pynim jakpoh ïa lade tang da ki kam bylla sngi. Nalor ka ka bylla sngi kaba u la ju trei baroh shi katta, kawei na ka kam ba dei ban ai jingïaroh ka long ba u la sdang pat da kawei ka kam kata ban tam ïa ki bitor um, ki bitor kyiad ha kylleng ki jaka ka thaiñ Nongpoh, kaba long shi bynta ban ïada ïa ka mei maraing.
Haba trei ïa kane kam ban tam ne lum kyrpang ïa ki bitor um, ki bitor kyiad ba ju bret pathar da ki riew bym don jingkitkhklieh ïa ka mariang, u Bah Arjun Nongshli u la shna kyrpang syndon da ka Kali Thela (Tri-cycle) ban pyndonkam ha kaba lum ïa kitei ki bitor um bad ki bitor kyiad bad ïa kane ka Thela la ai sngewbha ruh da u MLA ka Nongpoh, u Bah Mayral Born Syiem ba un pyndonkam na ka bynta ka kam kaba u trei ha kaba lum ïa kitei ki bitor ha kylleng ki jaka paidbah ha ka thaiñ Nongpoh.
Haba kren halor ka khuid ka suba, lah ban ong ba bun haduh kine ki snig kim pa don lang kata ka jingkitkhlieh ban wan rah ïa ka khuid ka suba ha ki jaka paidbah, ha kaba bun ki dang bret pathar ïa ki jaboh khamtam ki botor um, ki bitor kyiad ha ki jaka paidbah bad une u rangbah pat u dei uwei na u nonglum nonglang ban lum ïa kitei ki jaboh kaba long shi bynta ban ïada ïa ka mei mariang.
Kumba la ïathuh da u Arjun Nongshli, u la ong ba u la sdang ïa kane ka kam la kham slem hadien ba u la iehnoh noh ïa ka kam bylla sngi bad phai noh sha kane ka kam bad da ka jingtrei shitom u shang kylleng ki shnong bad ki jaka paidbah ha ka thaiñ Nongpoh ban lum ïa ki bitor um ne ki bitor kyiad ba bret ki riew paidbah bad hadien ba u la lum u sa leit ban die kylla na ka bynta ban ïoh ïa ka bainong trei jong u.
Haba kren halor ki kam ba la trei da une u rangbah, ki bor shnong, ki bor sorkar ki la dei ban ai jingïaroh ïa u ha kaba wat la um dei u briew uba la don ka jingnang jingstad bad phewse u trei pat ïa ka kam kaba ai nuksa sha baroh ki nongshong shnong ba kim dei ban bret pathar ïa ki jaboh bad ki dei ban don lang kata ka mynsiem jong ka jingïatrei lang na ka bynta ka khuid ka suba bad ruh ban ïada kyrpang ïa ka mariang, namar ka jingbret pathar ïa ki jaboh khamtam ki bitor, ki plastic bad ki bilor kyiad ka ktah shisha ïa ka mei mariang.
