Dei u ma Vincent uba khlem khot pynlong ïa ka jingïalang ka DISHA ha East Khasi bad Ri Bhoi : Mondal

Shillong, Rymphang 26: U MP ka Congress na Shillong Parliamentary Constituency u Ma Vincent H Pala, la kynnoh ba u khlem khot pynlong ïa ka jingïalang jong ka DISHA ha East Khasi Hills bad Ri-Bhoi District ha kine ki shisnem bala leit noh.
ïa kane la pyntip da u Myntri ka Tnad Community & Rural Development u Abu Taher Mondal haba jubab ïa ka jingkylli hapoh ka Dorbar Mang tyngka hynne ka sngi Nyngkong.
Halor ka jingkyrpad jong u MLA ka VPP na Mawryngkneng bad MLA ka UDP na Nongpoh ban kyntu ïa u MP ba un khot ïa ka jingïalang jong ka DISHA, u Mondal ula ong “Ngan sa pyntip ïa u MP ba un khot ïa ka jingïalang jong ka DISHA”.
Kat kum ka jingong jong u, ka jingpynlong ïa ka jingïalang jong ka DISHA ka shong ha ka bor jong u MP bad ka dei ka jingïalang ban shong bishar kam halor ka jingpyntreikam ïa ki flagship programme bapher bapher ka Sorkar Pdeng bad ruh ban khmih ïa ki jingeh ba mad da ki nongïoh jingmyntoi.
Haba jubab bynrap, u Myntri Rangbah ka Jylla Conrad K Sangma ula ong ba ka DISHA kam dei satia ka prokram jong ka Sorkar Jylla.
“Kam dei ka kamram jong ka Sorkar Jylla ban pynlong ïa ka jingïalang. Ka Sorkar India ka peitngor(ïa ki skhim ka Sorkar Pdeng) lyngba ki MP bad ki MP jong kato ka Constituency ki don ïa ka bor ban khot ïa ka jingïalang namar ka dei ka kam ba long beit tang hapdeng ki Tnad sorkar bad u MP bad u MP u dei ruh u Chairman ban khot ïa ka jingïalang”ula ong.