Ym pat ju don koit ka sorkar ba bamsap bad ba kput kum kane kaba mynta: Ardent

Shillong, Rymphang 26: U MLA jong ka Voice of the People Party (VPP) ba mihkhmat ïa ka Nongkrem Constituency ha ka sngi Nyngkong u la ong ba ha ka history jong ka synshar khadar ym pat ju don koit ka sorkar kaba bamsap bad ba ap kmang ban pynhiar kput ïa ki MLA ka Liang Pyrshah kum kane ka sorkar kaba mynta.
Haba shim bynta ha ka mat ïatai (motion) ïa kaba la wanrah da u MLA ka Congress na Nongstoiñ u Bah Gabriel Wahlang halor ka jinglong nongwei ki riewlum trai muluk na ka daw ba kim don wat tang i lyngkhot khyndew ba rit eh, u Bah Ardent u la ong ba kane ka jingeh kaba ki nongshong shnong ka jylla ki mad ka dei na ka daw ba la synshar ka bamsap bam klop ïa ka jylla.
U Bah Ardent u la ong ba ka sorkar jylla ka la kdiah ïa ki bniat ka Meghalaya Transfer of Land Regulations Act da kaba bsut ïa ki amendment ka dei kawei na ki lad kaba ki bym dei ki riewlum trai muluk bad ki briew kiba na bar ban ïoh jaka puta ha ka jylla katba ki trai muluk pat kim ïoh khyndew satia.
U la ong ruh ba kaba kham shyrkhei mynta ka dei ka jingthied khyndew da ki riewlum na uwei pat u riewlum na bynta ban ïoh die pateng sha ki bym dei ki riewlum.
“Ka jingwanrah ïa ka amendment ha ka Land Transfer Act ka la pyntlot haduh katta katta ïa ka aiñ teh lakam thied ne die kyndew ha ka jylla ha kaba ki briew kiba na bar ki ïoh thied khyndew ha ka kyrteng ka Power of Attorney, ka roi ka par lyngba ki company, ki niam bad kiwei kiwei ki rukom katba ki trai muluk pat ki nang kiew ha ka jingbym don khyndew (landlessness),” u la ong.
“Ha ka jingshisha ngi ki riewlum trai muluk ngi la don ki aiñ kiba bun ban ïada ïa ngi, ngi don ki Autonomous District Council, ka Land Transfer Act, ka Prevention of Benami Transaction Act, hynrei balei ka don beit ka jingrit mynsiem ha ngi, ka daw hi lada ngi tih sani ka dei ka jingjur palat ka bamsap bad lada ngi leh klet ïa kane ka daw ka jingeh kaba kham khraw ka nang ap shuh shuh,” u la bynrap.
U la ong ba u Myntri Rangbah u la kam ba ka jingpynkylla ïa ka Meghalaya Lokayukta Act ka dei ba kane ka bor tohkit bamsap kan treikam pura, ‘ka jingkylli mynta kaba mih ka long la hato ka ïoh ne em pat ban treikam laitluid’, ong u Bah Ardent.
U la ong ruh ba ka jingpynksan u Myntri Rangbah ïa ka jingweng ka sorkar ïa ki ophisar tohkit ka Meghalaya Lokayukta ka dei ka kam kaba i samut ban peit, “La pynshai sha ngi ba la weng ïa kine ki laingut kkt ophisar tohkit ban lait ka lut phut lada thung beit da kiba dang trei ha kane ka kam ha jaka ban thung da kito kiba la shongthait bad ka long kaba i thamula ba udei u juh pat u Myntri Rangbah uba pynksan ïa ka jingpynlut ban siew ïa ka tulop ki 175 ngut ki Chairman bad Co-chairman, Vice Chairman bad Deputy Chairman,” u la ong.
“Hana la ïathuh ïa ngi ruh ba ka sorkar ka bakla thung ïa kine ki ophisar tohkit naduh kaba sdang, sngew samut ban sngap ïa kane ka jingai daw namar ngi tip shai ba la weng na ki daw kiba baroh ngi la tip bad kane ka dei ka khubor kaba shai sha ki ophisar ba lada ba lada phi trei hok ïa ka kam kiba kum kine kiei kiei kin jia,” u la bynrap.
Haba kren halor ka jingbym treh ka sorkar ban mynjur ïa ka kyrteng ki dkhot ka Block Development Monitoring Council (BDMC) u Bah Ardent u la ong ba kane ka dei ka kam bamsap kaba khraw, ‘namar haba ngi ong bamsap kam thew tang ïa ka kam pisa tyngka hynrei ka kynthup ïa ka jingpyndonkam bakla ïa ka bor bad ka jingïaid lait na ki kyndon bad ki rukom ba dei ban ïaid,’ u la ong.
“La shisnem tam ki MLA kiba thymmai kane ka ïingdorbar ki la shimti na ki MLA kiba rim hynrei sngew lyngngoh ba ki dkhot ha ka Block Development Monitoring Council ki briew kiba ki MLA kiba la rem ki thung dkhot ki bteng haduh mynta katba kat kum ki rukom ka dei ba ynda la kut ka samoi san snem ki MLA kiba thymmai ki ju phah ïa ka kyrteng ki dkhot kane ka committee sha ka sorkar hynrei tad haduh mynta kiba bun ki MLA na ka liang pyrshah ki dkhot kiba ki la phah kim pat ïoh jingmynjur haduh mynta, lada ka sorkar kam mynjur kloi lan ïa kane ngim banse ban mih surok ban pynbor ïa ka sorkar halor kane bad ban sei madan ruh ïa ki kam buit tuh ka sorkar bad ruh ka jingpeit poh ïa u paidbah ba la jied ïa ngi”, kynthoh u Bah Ardent.
“Lehse kum ki dkhot ka Liang Pyrshah bad ka sorkar ngi lah ban ïa sei ki jingpyni nia ha ïingdorbar hynrei ka sorkar ka dei ban sngewthuh ba kam dei ba ngi ïania shimet hynrei ka dei ka jingpyni nia halor ki mat bad policy treikam jong ka sorkar,” u la bynrap.
Shuh shuh u la ong ba kane ka jingleh ka sorkar ka dei ka jingpynhiar kput (vindictive) ïa ngi kiba ha Liang Pyrshah bad “Ym ju don koit ka sorkar ka kum kane” u la ong.