Ba sngewhun kum u nongïalam paidbah, ai jingkyrshan u Nongkyrshan UDP ïa u kyrtong ka BJP Mawhati
Nongpoh, Rymphang 06: U Bah Marshal Dkhar, uwei na u nongkyrshan ba la rim ka UDP na Mawhati Constituency bad uba shong ba sah ha ka shnong Mawlyngkhung mynta ka sngi u la pynthikna ïa lade ba u la wan ban kyrshan ïa u kyrtong ka BJP Mawhati Constituency halor ka nongrim ba u iohi jngai ba u kyrtong ka BJP, u Dr. Evarist Myrsing u dei u samla uba la biang pura ban long u nongïalam na Mawhati Constiteuncy.
Kine ki jingshisha ba u Bah Marshal Dkhar kum u rangbah bad u nongkyrshan ba la rim ka UDP na Mawhati Constituency, ka la paw ruh mynta ka janmiet ba ki nongïalam ka BJP ki la pdiang sngewbha ïa u sha ka party BJP ba un ai kata ka jingkyrshan na ka bynta u Dr. Evarist Myrsing kum u kyrong ka BJP na Mawhati Constituency ha ka jingïalang kaba la long ha ka ophis treikam ka BJP ha Nongpoh.
Ïa u Bah Marshal Dkhar la pdaing sngewbha ruh da u President ka BJP Ri Bhoi, u Bah Skhem B. Swet lem bad u Presdident ka BJP Mawhati Mandal, u Bah Shanbor Rympei lem bad u kyrtong ka BJP Mawhati, u Dr. Evarist Myrsing bad kiwei kiwei ki nongïalam ka BJP na Mawhati.
Kumba la pynpaw da u Bah Marshal Dkhar, ka daw kaba u la wan ban kyrshan ïa u Kyrtong ka BJP, ka dei namar ba u sngewïahap bad hun ïa ka nongrim jong une u samla bad u don ruh kata ka jingiohi jngai b aune u samla lada u wan ha ka bor un lah ban wan rah kata ka jingkylla ha ka Mawhati Constituency.
U Bah Marshal Dkhar u la pynpaw ruh da kaba ong ba u la dei u nongkyrshan bad nongïalam ka UDP ba la rim bha ha Mawhati naduh ki snem 1972 bad ha kane ka kynti u la wan ban kyrshan noh ïa u Dr. Evarist Myrsing kum u kyrtong ka BJP halor ka nongrim ba u don ka jinghun bad ka jingshaniah ba une u samla u dei u samla uba ba la biang ka kyrdan bad ruh ba u la kot bor ban long uta u nongïalam paidbah na Mawhati Constiteuncy.
Na ka liang u Kyrtong ka BJP Mawhati, u Dr. Evarist Myrsing bad u President ka BJP Ri Bhoi, u Bah Skhem B. Swet ha kane ka sngi ki la pdiang sgnewbha ïa une u Rangbah ban ai ka jingkyrshan ïa ka BJP na Mawhati bad ki la pynpaw ruh ka jingkmen ban don kum une u rangbah uba don ka jingiohi jngai ban wan kyrshan ïa ka BJP namar lait tang ka BJP kaba don ïa ka bor ha ka sorkar pdeng kaba lah ban wan rah ïa jingkylla ha Mawhati Constituency, kaba dei ka Constituency kaba dang sahdien ha Ri Bhoi.