Thep kyrteng ki ar ngut ki kyrtong jong ka BJP na Sutnga Saipung & Khliehriat Constituency

Khliehriat Rymphang 06 : Ki ar ngut ki kyrtong jong ka party BJP kiba kynthup u bah Krison Langstang, uban ïakhun na ka Sutnga-Saipung Constituency bad u bah Yesbha Chyrmang, u ban ïakhun na ka 6- Khliehriat Constituency, mynta ka sngi ki la wan ban thep kyrteng (nomination) ha ki Returning Officer ha ophis u Deputy Commissioner ka East Jaiñtia Hills District ha Khliehriat.
Haba kren sha ki pathai khubor, u kyrtong na ka 6-Khliehriat Constituency, u bah Bhayes Chyrmang , uba shnong ba sah ha Ladrymbai, u la pynpaw ïaka jingangnud jong u ban kyntiew ym tang ïaka constituency, hynrei ban kyntiew ïaka district hi baorh kawei, ban wanrah ruh ïa ka roi ka par, u la kular ruh ba lada ka BJP kan wan ha ka bor khlem pep ki paidbah kin sa ïoh biang ka lad ban tih dewïong, ban khaiï dewiong kumba ju long mynshwa, namar naduh ba khang ïa ka kam khaiï bad tih dewiong, ka la don shibun ka jingshah ktah ki paidbah ha kiba bun ki liang, ka la ktah ruh ïa ka ïoh ka kot.
Shuh shuh, u bah Yesbha Chyrmang, u la kren bun kiei kiei kiba ka district ka dang donkam, kum ki skul, ki college, ki jaka ai jingsumar, kum ki hospital, da kaba kynthoh ruh ba kane ka hospital kaba don mynta ruh ka long tang ka kyrteng hynrei ka dang don shibun bha ki jingduna ha ka rukom ai jingsumar ïa ki paidbah ka thaiñ, kumjuh ruh ki surok, ki lynti ki syngkien, u la ong ba dei tang ka party BJP kaba lah ban wanrah ïa ka bha ka miat, ka roi, ka par, u la kren ruh shaphang ka byntreikam bha ka skim shna ïing ïa kiba duk kaba dei ka skim ba la pyllait da u N.Modi, “U myntri rangbah ka ri, u N.Modi, u ong ba ha poh India uwei pa uwei u dei ban ïoh ka ïing shong iing sah, khamtam kito kiba duk, ki dei ruh abn ioh ïa ka bam ba biang, kumta dei ban jied ïa ka party BJP, lada ngi na kyndong ngi shai, baroh ka ri India kan shai, lada ngi na kynodng ngi dum, baroh ka ri India kan dum” pynkut u bah Chyrmang.
Kumjuh ruh, u kyrtong jong ka BJP na ka 5 Sutnga-Saipung Constituency, u bah Krison Langstang, uba shong ba sah ha shnong Jalaphet Bri Sumer, u la ong b aka jingmih jong u ban ïakhun na ka party BJP ka dei namar ba u iohi ba dang don shibun ki jingduna hapoh ka constituency, naduh ki jaka ai jingsumar, ki surok, ki lynti ki syngkien bad bun kiwei kiwei ruh, bun ruh ki skim kiba wan na ka sorkar BJP ki shu sepei bad ki shu jah rngai,, u la kyrpad ïa ki paidbah jong ka 5- sutnga saipung consty ba kin sngewbha ban kyrshan lem ïa ka BJP, namar dei tang kane party kaba lah ban wanrah ïa ka roi ka par, kaba lah ban ai ïa ka jingthrang jong u paidbah bad ka ban pynkiew ïa ka lawei.