ba shah ktah ki khynnah skul: Hiar u Magistrate ban leit jurip ïa ka Karkhana ba pynmih jaboh ha Byrnihat
Nongpoh, Rymphang 10: Tang hadien ka jinghiar jurip ka Seng HITO bad ka jingmih shah ktah ki khynnah skul na ka jingmih ki jaboh na ka Karkhana ha Harligbagan, Byrnihat, ki Magistrate bad ki bor ba dei peit na ka tnad Meghalaya State Pollution Control Board mynta ka sngi ki la hiar ban leit jurip na ka bynta ban tohkit halor ka jingshah kynnoh ba shah ktah ki paidbah bad ki khynnah skul na ki jaboh bad ki lyer sma iwtung ba mih na ka Karkhana ha Byrnihat.
Na ka liang ka bor synshar District la mihkhmat da u Bah L. Kharmon, uba dei u District Magistrate bad na ka liang ka Meghalaya State Pollution Control Board la mihkhmat da u Bah F.F Laloo kum u Environmental Engineer ban leit jurip halor katei ka jingshah kynnoh ba shah ktah ki khynnah skul na ka jingmih ka tdem bad ki lyer sma iwtung na katei ka Karkhana kaba don ha Byrnihat.
Kane ka Karkhana kaba la shah kynnoh halor ka jingpynmih jaboh bad ki lyer bas ma iwtung la tip kyrteng ruh kum ka Meghalaya Cast and Alloy Private Limited bad katkum ka jingtip ba la ioh lum ruh kane ka Karkhana ka la hap ruh ban siew ïa ka kuna ba la tip kum ka Environmental Compensation halor ka jingpynkhein ïa ki kyndon kiba dei katkum ka Section 33A jong ka Water prevention and Control pollution Act 1972 bad ka section 32A jong ka Air Prevention and Control Pollution 1981 kaba la kot sha ka T. 500000.
U Magistrate bad ki bor ba dei peit Meghalaya State Pollution Control Board ki la hiar ban jurip bad ki la leit ban ia kynduh ïa ki bor ba dei peit katei ka Company na ka bynta ban pynlong ïa kata ka jingtohkit halor kitei ki jingshah kynnoh ba ka pynmih ïa ki lyer jaboh bad ki lyer ba sma iwtung kaba ktah ïa ka koit ka khiah ki paidbah.
Kumba la pynpaw da kitei ki ophisar sorkar kiba la leit ban jurip ïa katei ka Karkhna, ki la ong ba kin sa phah ïa ka kaiphod sha ka Meghalaya State Pollution control bad kumjuh ruh sha u Deputy Commissioner ka Ri Bhoi hadien ba ki la wan ban jurip bad ban tehlakam ïa kane ka Company kan shong ha ka rai jong ki bor ba halor katkum ka jinglap lyngba ka kaiphod kaba ki la wan ban jurip ïa kane ka Company.