Shillong, Rymphang: Ka Seng FKJGP-Upper Shillong Circle, ha ka sngi Palei ba la lah ka la leit ban mudui sha u Deputy Commissioner halor ka jingeh ba ki paidbah ka thaiñ Upper Shillong kila mad na ka jingjur palat ka jingdheng kali ha surok Umshyrpi-Upper Shillong ba jia manla ka sngi.
Ka Seng ha u kyrwoh lyngba u samla Kitboklang Nongphlang, President ka FKJGP-Upper Shillong Cirle ka la ong ba ka jingdheng kali ha kane ka surok (Umshyrpi-Upper Shillong) kala mih manla ka sngi ha kane ka shitaïew tam. Ki kali kiba hiar sha Shillong bad kiba kiew na Shillong lyngba kane ka surok, kila sahkut ha ka jingdheng kali ba da ki kynta, kaba la pynshohsat palat liam ïa ki nongleit nongwan.”
U la ong ba ki la pyrshang ban wad ïa ki daw jong kane ka jingdheng kali bad lap ba ka daw hi ka dei namar ka jingsiang pipe um jong ka tnad Public Health Engineering (PHE) ha ka surok ba markhap ka Farm jong ka Tnad Animal Husbandry kaba don ha Sixth Mile, Upper Shillong. U la ong ruh; “Kumba phi tip, kane ka surok ka dei kaba pynïasoh ïa baroh ki thaiñ jong ka Sohra Civil Sub-Division, baroh ki jaka ba hap hapoh ka Pynursla Civil Sub Division, baroh ki jaka ba hap hapoh ka Mawphlang Block bad Sohiong Block, baroh ki jaka ba hap hapoh ka Mawsynram Block bad baroh ki jaka ka West Khasi Hills, South West Khasi bad Eastern West Khasi Hills”.
Shuh shuh u la bynrap da kaba ong “Namar kata kano kano ka jingdheng kali ha kane ka surok kan lam sha ka jingdheng kali kaba jur bha bad da ki hajar ngut ki nongleit nongwan, ki nongleit Ophis, ki nongshangkai pyrthei kin shah ktah jur bha. Ki paidbah na ki jaka khappud kiba donkam ïa ki jingsumar ba kyrkieh ha Shillong ki dei kiba shah ktah jur bha.” Une u Nongialam ka FKJGP ula ong ba kane ka jingdheng kali kala wanrah ïa ka jingeh kaba jur ïa ki samla pule khamtam kito kiba ïaleh ïa ki eksamin jong ja Pre-Board Examination, kiba la hap ban ïaid da ka kjat ban poi sha ki jaka ïaleh eksamin ha Shillong.
“Ka jingkylli ka long ba mano ban shim ïa ka jingkitkhlieh lada kine ki samla pule kim lah ban poi sha ki jaka thoh eksam ha ka por kaba biang. Ki samla pule na Shillong kiba pule ha ki skul ba don ha ki thaiñ Upper Shillong kum ka Army School ha 101 area bad Kendriya Vidyalayaha Eastern Air Command ki dei kiwei na kiba shah ktah bha” ula ong.
Ha kajuh ka por, u samla Kitboklang ula pyntip ba ka FKJGP ka don ïa ka jingsngewkhia halor ka jingpynslem ïa ka jingpyntrei ïa ka kam ba ïadei bad ka jingshna ïa ka surok 4 lane na Umshyrpi sha Umtyngngar. U ong ba ki nongleit nongwan kila kylla long ki langkñia namar kane ka jingpynslem kaba mih na ka kam ïadie ïathied jaka bad kiwei kiwei.Ka FKJGP kala ai jingmut ba ka Tnad PHE ka dei ban siang noh ïa ki pipe um ha ka por mynmiet ha kane ka surok namar ka jingduna ki kali ba ïaid ba ïeng.
Shuh shuh ka FKJGP ka kyntu ïa u DC ba un bthah ïa ki bor ba dei khmih jong ka Tnad Forest & Environment bad ka Meghalaya Energy Corporation Limited (MeECL) ba kin pynkloi ha ka jingpynkyllem ïa ki dieng bad pynkynriah ïa ki nar post elektrik ha shilynter kane ka surok jong ka project 4 lane khnang baka kam kan sdang noh ha ki jaka ki bym donkam ka jingïakajia.
