Hiar jurip ka HITO hadien ka jingioh pang ki khynnah naka tdem karkhana ha Byrnihat

Nongpoh, Rymphang 10: Ka seng HITO Ri-Bhoi District hapoh ka jingïalam u Bah Ban Kharnaior President mynta ka sngi kila hiar jurip sha ka thaiñ Byrnihat hadien ka jingmih khubor halor ka jingiohpang ki khynnah skul ka Don Bosco Higher Secondary School, naka jingring mynsiem ïaka tdem bala pynmih da ki karkhana ha katei ka thaiñ.
Kum ban pynkynmaw, ka Byrnihat ha Ri Bhoi District ka dei kawei na ka jaka ba bun bha ki Karkhana bapher bapher ba la wan ban pyntreikam ha katei ka thaiñ bad la tip ruh kum ka Meghalaya Export Promotion Industrial Park, kiba hap ha ka jingpeit jingkhmih ka sorkar Meghalaya haka thaiñ Byrnihat, bad kawei naki karkhana kaba la ktah jur ïaki paidbah bad ki khynnah skul ha katei ka thaiñ ka dei ka Meghalaya Cast and Alloy Private Limited.
Ha katei ka jingleit jurip jong ka seng mynta ka sngi, naka liang ki nongïalam kila ioh ruh ban ïakynduh ïa ka Principal jong katei ka skul lem bad ki nongïalam shnong kiba la pynpaw ruh bunsien ïaka jingpyrshah ïa katei ka karkhana bad kum ki bor shnong bad kumjuh ruh ka skul kila ujor ruh da ka ejahar pyrshah ïa katei ka karkhana hynrei ym don ba pynsngap tad haduh hynnin ka sngi bala mih syndon ka jingjia ioh pang bad pynlong ïaki khynnah skul ban prie haka por ïalehkai.
Naka liang u Bah Ban Kharnaior kum President ka seng HITO ha Ri-Bhoi u la pynpaw ban aka liang ka seng mynta ka sngi kala ujor da ka ejehar ha Byrnihat Police Station bad ruh ban ujor sha u Deputy Commissioner ka Ri-Bhoi District ban pynlong ka jingtohkit ban phah ruh ïaki doctor naka bynta ban peit bad khmih ïaka jinglong jingman jong ki khynnah ha katei ka skul.
“Ngim kwah ba katei ka company kan ai tang ka bai dawai hynrei kum ka seng ka dawa naka Meghalaya State Pollution Control Board ban pynduh syndon ïaka lisen jong katei ka company namar ka jingshah ktah ka ju jia beit man ka por ha kaba bun ki paidbah nongshong shnong ki ju ud ki ju nam naki jingsma bad ki jaboh kiba mih na ki Karkhana kiba don ha Byrnihat ha Ri Bhoi District” la ong u Bah Ban da kaba bynrap ruh ba ka jingdon katei ka karkhana ka long pynban ka jingtim ïaki paidbah kiba im jynjar bad sohsat ha katei ka thaiñ.
Shuh shuh naka liang ka seng kala byrngem ruh ba lada ka State Pollution bad ki bor district kim leh eiei halor katei ka bynta naka liang ka seng kan thom da ka bor ban leit khang ïa katei ka karkhana khnang ba ki paidbah khamtam ki khynnah skul kin nym mad jingeh namar kane ka dei ka kam pynïap briew da katei ka company.