Ba la jot shaba palat ka surok NH-6, bthah u DC ïa ki nongñiah kali ban phikir bha

Khiehriat, Nailur, 10: U Deputy Commissioner jong ka East Jaiñtia Hills District uba dei ruh u Chairman jong ka District Disaster Management Authority (DDMA) ula bthah ïa baroh ki nongñiah kali ha ka surokbah National Highway-6 ha ka thaiñ Narpuh ba kin long kiba phikir bha haba ñiah kali bad ban bud ruh ïa ki kyndon ñiah kali namarba ki don ki jingkieng kiba la julor bad kiba buh jingma.
Ka jinglong jingman ka surokbah NH-6 ha Narpuh ruh ka la nang jot nang julor shuh shuh, bun ki kali ki sahkut ha ki thliew ki syar, bun ki kali ki jot, ki julor na ka daw ka jingsniew palat ka surok ka bym i dei shuh kum kata ka surokbah National Highway. Ym lah ban len ba ka la don ka jingshah ktah kaba jur bha ha ka leit ka wan jong ki paidbah kiba ïaid lyngba na kane ka surok.
Ka ophis u Deputy Commissioner ka la ïoh jingtip ba ki jingkieng kiba don ha surokbah National Highway ha Tongseng, Sonapyrdi, Pyrtakuna, Umkiang bad ha Ratachera kiba hap hapoh Lumshnong C&RD Block ki la julor haduh katta katta bad ki la buh jingma ïa ki paidbah kiba ïaid lyngba na ki jingkieng. Kumta halor kane, u Deputy Commissioner u la bthah bad phah ruh da ka jingthoh sha u Project Director jong ka National Highway Authority of India (NHAI) ba la donkam kyrkieh eh ban pynbha ïa ki jingkieng kiba la julor bad kiba buh jingma.
U kyntu ïa kiba ñiah kali ba ki dei ban da phikir bha haba ki ïai na shiliang sha shiliang jong ki jingkieng kiba don ha ka shnong Tongseng, Sonapyrdi, Pyrtakuna, Umkiang bad ha Ratachera khnang ban lait na kino kino ki jingjia ba sngewsih tat haduh ba ka NHAI kan da lah ban shna pynbha ïa ki jingkieng.