Nongpoh, Nailur 10: Hadien shipor ba la kynjah ki kam tuh kam thiem ha ka sor Nongpoh, ki runar ha ka miet Lah Sngi u Blei ki la sdang biang ïa ka kam tuh bad prong tuh na ki ar tylli ki dukan ha sor Nongpoh bad rong tuh ïa ka pisa bad ki tiar ba don ha kine ki dukan.
Ki ar tylli ki dukan ki kynthup ïa ka Moonlight Studio kaba dei ka dukan shondur bad die ruh ïa ki tiar ba bun jait kaba don ha ka building ba la long trai da u Bah Hubert Marweiñ bad kawei pat ka dukan jong u Tuta Miah kaba die ïa ki tiar marbam bad ki tiar khutia mutia.
Katkum ka khubor ba la ïohlum la ïathuh ba kane ka ljingjia ka lah ban jia hynnin shiteng synñia lane shuwa ban kynjat shai, ha kaba ki runar ki la shu kyndang jubor ïa ka jingkhang nar (shutter) bad rong tuh bun ki tiar ki tar bad ka pisa haduh ba ki trai dukan kim lah ban tip katno ka jingshah tuh.
Ki runar ba donkti ki la pynpra dusmon ruh ïa ki tiar ki tar kiba don hapoh ka ka dukan shuwa ban mih.
Na ka liang ki trai jong ki ar tylli ki dukan ki la ujor da ka ejahar ha ki Pulit jong ka Nongpoh Police Station bad marmar na ka liang ki Pulit ki la leit ban jurip ïa ki ar tylli ki dukan ban pynlong ka jingtohkit bñiah.
Haduh mynta ki Pulit ki dang pynlong ïa ka jingtohkit kaba bniah ban lap ksai ïa ki runar kiba donkit ha kane ka kam.
