Shillong, Nailur 10: U Symbud Myntri Rangbah ka jylla uba khmih ïa ka tnat ka Kit ka Bah ne Transport u Bah Sniawbhalang Dhar ha ka sngi ba-ar u la pyntip ba ka sorkar jylla ka dang ap ïa ka kaiphod kaba biang la yn lah ban pynhiar ïa ki liengsuiñ kiba heh hapoh ka Kad Liengsuiñ ka Shillong (Shillong Airport).
Haba kren sha ki lad pathai khubor, u Bah Dhar u la ong, “Ngi dang ap ïa ka kaiphod kaba khatduh na u consultant ba la thung da ka Airports Authority of India (AAI). Bad tang shu la ïoh ïa ka kaiphod mardor ngin sa ïakren halor kane ka kam.”
U la pyntip ba la khmih lynti ba u consultant un sa aiti ïa ka kaiphod kaba biang la kumno kumno ha ka taïew ba khatduh jong u bnai Risaw. “Ngi don ka jingkyrmen ba ka kaiphod kan don ha la lynti kaba dei namar ka sorkar ruh ka la sngewkhia halor kane kam,” bynrap u Bah Dhar.
Haba kylli, u Symbud Myntri Rangbah u la ong ba la bthah ïa u consultant la ka long ne em kaba biang ïa ki liengsuiñ kiba heh ban hiar hapoh ka Shillong Airport.
“Bad lada ka long kaba biang, kin pynkhreh ïa ka detailed project report (DPR) bad ba kin ïathuh ïa ngi haduh katno ka jaka kaba dang donkam kaba dei ban ai na ka bynta ban pynheh ïa kane ka airport,” u la ong.
