Ba jyllei ki nongdie madan ha ki lynti ïaid kjat, kynduh ka HNYF ïa u Syiem Hima Mylliem

0

Shillong, Ïaïong 18: Namar ka jingjyllei ki nongshong die Madan khamtam eh ki bar jylla ha ki lynti ïaid kjat ha ki bynta ka Ïewduh bad them Ïewmawlong, kaba la wanrah ka jingkhapngiah ïa ki paidbah ba wan siew wan tda bad ba ïaid lyngba na ka liang ka Hynñiewtrep National Youth Front (HNYF) East Khasi Hills ha ka sngi baarka la leit ban ïakynduh ïa u syiem ka Hima Mylliem u Paiem Ainam Manik Syiem ban dawa ba ka hima kan peitngor bad shimkhia ha kaba ïadei bad kane ka kam.
Haba kren bad ki lad pathai khubor u President ka seng u Bah Bless Dkhar u la ong ba kane ka jingïa kynduh ka long ban ai jingtip bad jingujor sha u Syiem ha kaba ïadei bad ka jingjyllei ki nongdie bar jylla ha ki lynti ïaid kjat khnang ba na ka liang ka Hima bad u Syiem kin lah ban shim ïa ki sienjam kiba dei bad kane ka bynta.
“Na ka liang u Syiem u la kular ba ha kine ki khyndiat sngi ban sa wan ryngkat ka seng ngin sa leit jurip ïa ka Ïewduh bad na ka liang ka seng ha kane ka sngi kan sa khynra kot khynra sla ruh ïa kito ki nongdie bar jylla kiba la pynkhapngiah ïa ki lynti ïaid kjat,” u la ong.
“Lada phi ïaid kjat na Motphran sha Anjelee phin hap ïaid ha ktieh bad ha surok namar ha ki lynti ïaid kjat la jyllei da ki bar jylla nongdie madan,” u la bynrap.
U la ong ba kumba ka Ïewduh ka hap ha ka jingpynïaid ka Hima Mylliem bad District Council bad kumjuh ruh ki don ki bynta ba dei peit da ka Municipal u la ong ba ka seng kan buddien bad bad kine ki bor ba dei peit ban wanrah da ki lad ki lynti ban pynkylluid bad pynkhuid ïa ka namar ka dur ka dar kaba ka long mynta ka long kaba isait met.

Leave A Reply

Your email address will not be published.