Da ki Nepali pynlong mawpud bad pynkyntur pud ka sorkar Assam, ong u nongshong shnong ha Khanduli

Shillong, Ïaïong 18: Ka Video kaba la saphriang lyngba ki Social Media ha ka sngi Baar, kaba la pyni ba ki paidbah Karbi kiba shong ba sah ha Khanduli ki la beh krad ïa u Magistrate (ADC) jong ka West Jaiñtia Hills District bad ki Pulit Meghalaya haba ki la leit sha katei ban phah khang khyrdep ïa ka jaka khrong khajna da ki bor ka Karbi Anglong Autonomous Council (KAAC).
Haba u Mawphor u ïa kren bad uwei u Riewrangbah uba shong ha katei ka shong ubym kwah ban pynpaw kyrteng ïa lade u la ong ba ka jingpyni bor jong ka sorkar Assam bad ki bor ka KAAC kam dei shuh kaei kaei kaba dang thymmai bad ong ba ka sorkar Assam lei ka pyndonkam da ki buit sianti jong ka ban wanrah da ki Nepali ban shongshnong ha ki jaka khappud ban pynkyntur pud ha ki bynta ka jylla lyngba kine ki jaid bynriew.
“Ka jingwan buh ka KAAC ïa kane ka khynrop hangne ka dei na bynta ba kan ïoh lum khajna bad kumba long mynta ka jinglum khajna ka long beit napahnga ïa kino kino ki mar kaba ki Khasi ki rah hynrei katba ïa ki Karbi kim shym la shim khajna eiei bad ka jingwanbuh khyrdop lum khajna ka dei beit ban pynsohsat ïa ngi ki Khasi,” u la ong.
“Ngi kwah ban ai ka khubor kaba shai bad kaba tyngeh sha ka KAAC lada kim weng ïa kane ka khyrdop lum khajna bad na ka liang ka seng ruh kan sa pynïeng khyrdop lum khajna noh ban lum kylliang sa tang na ki Karbi kiba ïaid lyngba ka lapangap,” ong u President ka KSU haba kren bad u Mawphor.
U la ong ruh ba na ka liang ka sorkar Assam ka la pynbiang ïa ki pulit pahara jong ka ha katei ka jaka ‘katba na ka liang ka sorkar Meghalaya pat kam shym la shim kino kino ki sienjam ha kaba ïadei bad kane ka bynta,” u la ong.