Shillong, Iaiong 18: U Myntri ka tnat Pule Puthi Rakkam A Sangma hynne ka sngi Ba-ar, ula pyntip ba ka sorkar jylla ka dang pynkhreh ban kynthup noh ïa ki katto katne ki lynnong lane ki Curriculum jong ka Central Board of Secondary Education (CBSE) hapoh ki skul jong ka jylla kiba hap hapoh ka Meghalaya Board of School Education (MBoSE).
U Rakkam ula ïathuh, ïa kane la leh na ka bynta ban pynlong ïa ki khynnah bad ki samla ka jylla kiba la pynkhreh lada ki donkam ban hap ïakhun ïa ki eksamin bapher bapher ha kylleng ka ri India.
“Ka sorkar jylla lyngba ka tnat Pule Puthi ka dang pynkhreh ban pynrung noh ïa ki katto katne ki Curriculum jong ka CBSE sha ki skul jong ka Meghalaya namar kane kan pynlong ïa ki khynnah skul bad samla pule ka jylla ban ïakot bor bad kiwei ki samla pule ha kiwei pat ki jylla ka ri India” la ong u Rakkam.
U Rakkam ula ong ba wat haduh mynta ka sorkar lane ka tnat Pule Puthi kam pat shim rai khatduh hynrei kane ka jingkynthup ïa ki lynnong jong ka CBSE kan wanrah ka jingkyrkhu ïa ki khynnah skul bad samla pule jong ka jylla.
