Shillong, Ïaïong 18: Ka kynhun jong ki nongshongshnong ka shnong Mawmluh mynta ka sngi, ka la leit ban ïakynduh ïa u Bah Ardent Miller Basaïawmoit, MLA jong ka Nongkrem ban leit ai khublei bad pynpaw ka jingsngewnguh halor ka jingpyrkhat lem jong u ban rah ïa ka jingeh jong ka Mawmluh Cherra Cements Limited (MCCL) ha ka dorbar mangtyngka ba dang shu dep.
Kane ka kynhun kaba kynthup ïa ki Samla bad ki riew rangbah jong ka Shnong ka la ai ruh da ka shithi ban pynpaw ka jingsngewnguh kaba la soi ruh da kiba bun ki nongshongshnong. Nalor kaba ai da ka shithi, ki nongshongshnong ki la ai ruh da ka ryndia kum ka dak ka jingsngew burom bad kitbok kit rwiang ïa u President ka VPP.
Ha kane ka jingïakynduh na ka liang ki nongshongshnong ki la ïathuh ruh ïa ki jingeh kiba kane ka Karkhana dewbilat ba nyngkong eh ha ka jylla ka la ïakynduh ha kine ki sngi kiba mynta kynthup ruh ïa ka jingbymshai haduh mynta halor ka Joint Venture.
Shuh shuh ki la ïathuh ruh ïa ka jingsdang jong ka kane karkhana bad kumno ka shnong Mawmluh, ka la don ka jingïateh kular bad ki bor pynïaid ka MCCL da kaba shah ba kan tih ïa u mawshun ha ka dor kaba tad bha ryngkat ka jingïakut ba ki kam ki jam kiba lait ha kane ka karkhana yn kham peit shuwa ïa ki briew jong ka Shnong. Na ka liang ki nong Mawmluh ki la ïathuh ruh ha u Bah Ardent ïa ki daw balei ba kane ka karkhana haduh mynta kam lah ban khie khlieh wat haba ka sorkar ka la pyllut da ki klur tyngka na ka bynta ban pynkhie im biang ïa kane ka karkhana kaba la ju kyrshan ïa ki nong Mawmluh bad kiwei de ki shnong ha Sohra la bun tylli ki snem.
Na ka liang u Bah Ardent, u la tyrwa ba u kloi ban leit ïakynduh ïa ki bor sorkar ryngkat ki riew rangbah bad ki Samla na Mawmluh ban leit buddien halor ka MCCL da kaba bthah ruh ruh ban pynbiang ïa ki jingshisha kiba don ha kaba ïadei bad ka jingtreikam kane ka karkhana dewbilat kaba la seng naduh ka por jong ka sorkar Assam.
Haba ïakren bad ki nongthoh khubor hadien baladep ïakynduh ïa u Bah Ardent, uwei na ki nongïalam kane ka kynhun u Bah Wanstep Kharwanlang, u la ong ba ka jingwan ïakynduh jong ki ïa u Bah Ardent ka long ban pynpaw ka jingsngewnguh ïa u namar ka jingshimkhia lem jong u ïa ki jingeh ba ki nong Mawmluh ki ïakynduh namar ka jingbym treikam shuh kane ka karkhana. “Kum ki nongshongshnong, ngi sngewkmen haba don ki nongïalam kiba ym dei ba ki kren ne pyrkhat tang ïa ka Constituency la jong, hynrei ki peit lem ruh ïa ka jingeh jong kiwei pat ki shnong ki thaw ha ka jylla”, la ong u Bah Wanstep.
Halor ka jingtyrwa jong u Bah Ardent ban ïalam ban leit ïakynduh ïa ki bor sorkar, u Bah Wanstep, u la ong ba u pdiang sngewbha ïa kane bad na ka liang jong kiba la wan ïakynduh ïa u kin sa ïakren bha ha Shnong bad khamtam eh ban pynbiang ïa ki kot ki sla kumba la bthah da u Bah Ardent.
