Shna torti ka Kompeni ïa ka surok Bagli-Maheshkhola, kynnoh ka AKHAF ban don ka bamsap
Shillong, ïaïong, 18: Ka All Khasi Hills A’chik Federation (AKHAF), Shillong ha ka Lah Sngi u Blei ka la sorjamin ïa ka jingshna ïa ka surok ha khappud ka South West Khasi Hills District kaba sdang naduh ka shnong Bagli haduh Mahehkhola.
Ha u kyrwoh ba la phah da u General Secretary of AKHAF u Clivestar Ch. Marak, ka Federation ka la ïathuh ba ïa ka surok la ai tender sha ka M/S Dilip Paul & Sons Company ban shna bad ban siang rong ïa kane ka surok. Ka Federation ka la lap ruh ïa ka jingtrei torti bad kynnoh ba kane ka rukom trei ka don ka jyrsieh bamsap da ka kompeni.
Kane ka surok ka dei kaba kongsan haduh katta katta bad kaba pynïasoh ïa ki shnong kiba don ha khappud. Ym tang katta, kane ka surok ka dei kaba ki shipai Border Security Force (BSF) ki ju pyndonkam na ka bynta ban hiar sha ki ktem sah kiba don ha khappud ban iada ïa u pud u sam jong ka ri baroh arphew saw kynta.
Ha ka jingleit sorjamin ka Federation ka la lap ba u Kontraktor um shym la bud ïa ki kyndon ha kaba ïadei bad ka rukom shna ïa ka surok. Ka Federation ka la kynnoh ba wat ki tiar kiba la pyndonkam ban shna ïa ka surok ki long ki tiar ki bym ïahap satia bad nalor kata ka jingrben jong ka surok haba siang rong ka long tang shi inshi.
“Kane kan pynduna ïa ka jingshan slem jong ka surok bad kan pynjot kloi ïa ka surok,” la ong ka Federation.
“Kane ka pynpaw pylleiñ ïa ka jyrsieh bamsap bad ka Federation kan ym shong sngap jar halor kane ka bamsap,” ong u Marak bad bynrap, “kum kane ka rukom shna torti ïa ka surok kan buh jingma pynban ïa ka leit ka wan jong ki paidbah kiba sah ha khapud bad kumjuh ruh ïa ki shipai BSF.”
“Haduh mynta, dei tang kane ka surok kaba ki nongshong shnong jong ka thaiñ ki shahniah ha ka leit ka wan manla ka sngi bad na ka bynta kiwei kiwei ki jingdonkam. Hynrei ka rukom trei ïa kane ka surok ka long kaba pyndiaw haduh katta katta ïa ki paidbah. Namarkata, ka Federation ka dawa ïa u Kontraktor uba pyntrei ïa kane ka projek ban leit jurip mardor bad ban ai jubab ba balei ym shym la bud ryntih ïa ki kyndon. Ka Federation ka la maham ruh lada ka Kompeni, lada kam pynurlong ïa ka jingdawa ka seng kam banse ban mudui sha ki bor kiba shalor,” u la ong.
Ka Federation ka la dawa ïa ka tnat CPWD (Road) Shillong ban tuklar mardor ïa kane ka jyrsieh bamsap bad ban leh eiei noh mardor.