Pan jingtip ka NHRC na baroh ki jylla halor ki jaka sumar ïa kiba kyrni dih kyiad bad drok
Shillong, ïaïong, 18: Ka National Human Rights Commission (NHRC) ka la phah da ki notis sha baroh ki Chief Secretary jong ki Jylla bad ki Union Territories bad sha u Secretary jong ka Union Ministry of Social Justice and Empowerment ban pan kaiphod ha kaba ïadei bad ka jingbuh ïa ki De-addiction Centre.
Ka NHRC ka kwah ban tip haduh katto tylli ki De-addiction Centre ki don ïa mynta kiba hap hapoh ka jingpeit jingkhmih jong ka Sorkar, hato ki kynhun shimet ki lah neem ban buh ïa ki De-addiction Centre, la ki don neem ki rul ne ki kyndon ba la shna hapoh ka NDPS Act ban peitngor ïa ki De-addiction Centre kumba la kdew ha ka Section 71 jong ka NDPS Act.
Ka la pan jubab halor ki kyndon ban ai jinghikai sha ki briew kiba la shah thungkam ha ki De-addiction Centre; bad ban ïathuh ïa ki lad jingtreikam jong ki Private De-addiction Centre ba kynthup naduh ka jingshim bai sumar, ka jingthung kam ïa ki nongtrei, Counsellor, Medical Staff, ka jingpynbiang ïa ka bam ka dih bad baroh ki jingdonkam ha kine ki Rehabilitation Centre.
Kane ka la wan hadien ba ka NHRC ka la shimkhia ha kaba ïadei bad ki khubor ba la mih ha ki lad pathai khubor halor ka jingïap jong uwei uba la shah sumar ha kawei ka Private Drug De-addiction Centre, kaba long ka jingjia ha ka sien kaba lai.
La ïathuh ba uwei u samla uba la 24 snem ka rta u la shah bom ïap ha ki nongpynïaid jong ka De-addiction Centre ha Chandramani, Dehradoon, Uttarakhand ha ka 10 tarik mynta u bnai.
Ha kaba ïadei bad kane, ka Commission ka la shimkhia halor kine kijuh ki jingjia ha ki De-addiction Centre ha Noida bad ha Ghaziabad, Uttar Pradesh.
Ka Commission ka la peitngor bha ïa ki lai tylli ki Rehabilitation Centre, ar tylli ha UP bad kawei ha Uttarakhand ba la pynïaid da ki kynhun shi met. Ka
La phah notics ruh sha u Chief Secretary bad sha u Director General of Police, Uttarakhand ban pan ïa ka kaiphod kaba bniah halor ka jingjia ba dang shen halor ka jingïap uba shah sumar ha Dehradoon Rehab Centre.
Ka kaiphod ka dei ban kynthup ïa ka jingtohkit halor ka jingjia bad ka jingsiew bailutksan sha ki bahaing hasem jong uba la khladnoh.